دبئی: ایئرلائن ایمریٹس نے اعلان کیا ہے کہ وہ 15 نومبر 2025 سے دبئی اور دمشق کے درمیان اپنی پروازیں غیر معینہ مدت کے لیے معطل کر دے گا۔
ایئر لائن کے ترجمان کے مطابق یہ فیصلہ معمول کے آپریشنل جائزے کے بعد کیا گیا ہے تاکہ کمپنی اپنی طویل مدتی کاروباری حکمت عملی کے مطابق بیڑے کے استعمال کو بہتر بنا سکے۔
معطل کی جانے والی پروازیں
• دبئی سے دمشق کے لیے: EK913
• دمشق سے دبئی کے لیے: EK914
یہ سروسز اگلے نوٹس تک معطل رہیں گی۔
امریکی مسافروں کے لیے ایئرلائن کی ہدایات
ایمریٹس نے امریکی مسافروں سے درخواست کی ہے کہ وہ اپنے طے شدہ فلائٹس کے لیے کم از کم 4 گھنٹے قبل ہوائی اڈے پر پہنچیں۔
ترجمان نے بتایا کہ:
“سیکیورٹی اسکریننگ کے اوقات میں توسیع اور امریکا میں شٹ ڈاؤن کے باعث ملک بھر کے ایئرپورٹس پر مسافروں کا رش اور آپریشنل چیلنجز بڑھ گئے ہیں۔ لہٰذا تمام امریکی گیٹ ویز سے روانہ ہونے والے مسافر اپنی فلائٹس سے کم از کم چار گھنٹے پہلے ہوائی اڈے پہنچیں۔”
یہ اقدام ایسے وقت میں سامنے آیا ہے جب امریکا میں آپریشنل دباؤ کے باعث مسافروں کو زیادہ وقت درکار ہو رہا ہے، اور ایئر لائن نے اپنی سروس کے موثر انتظام کو یقینی بنانے کے لیے یہ پیشگی انتباہ جاری کیا ہے۔
