دبئی: دبئی ایئر شو میں بھارتی جنگی طیارہ تیجس گر کر تباہ ہونے کے بعد بھارتی فضائیہ کو شدید تنقید کا سامنا ہے، جبکہ سوشل میڈیا پر بھارتی صارفین نے ائیر چیف کے استعفے کا مطالبہ بھی کر دیا ہے۔
جمعہ کے روز دبئی ایئر شو کے دوران بھارتی لڑاکا طیارہ ایروبیٹک اسٹنٹ کرتے ہوئے گر کر تباہ ہوگیا۔ بھارتی ایئر فورس نے حادثے اور پائلٹ کی ہلاکت کی باضابطہ تصدیق کرتے ہوئے بتایا کہ طیارہ 2 بج کر 10 منٹ پر کریش ہوا۔ حادثے کی تحقیقات کے لیے کمیٹی تشکیل دینے کا اعلان بھی کیا گیا ہے۔
حادثے سے قبل بھی تیجس کے تکنیکی مسائل سامنے آچکے تھے
چند روز قبل سوشل میڈیا پر ایک ویڈیو وائرل ہوئی تھی جس میں تیجس کے فیول ٹینک سے تیل لیک ہوتے دیکھا گیا، جس پر پہلے ہی سوالات اٹھائے جا رہے تھے۔
دو سال سے بھی کم عرصے میں یہ تیجس کا دوسرا بڑا حادثہ ہے۔ اس سے قبل مارچ 2024 میں تیجس طیارہ راجستھان کے جیسلمیر میں گر کر تباہ ہوا تھا۔
بھارتی عوام کا غصہ بھڑک اٹھا، فضائیہ پر شدید تنقید
حادثے کے فوراً بعد بھارتی سوشل میڈیا صارفین نے اپنی ایئر فورس کو شدید تنقید کا نشانہ بنایا، جبکہ ائیر چیف کے مستعفی ہونے کا مطالبہ زور پکڑ گیا۔
بھارتی صارف انوشی تیواری نے ایکس پر لکھا:
“یہ پوری دنیا کے سامنے بھارت کے لیے ایک بڑی شرمندگی ہے، ائیر فورس کے سربراہ کو فوراً برطرف کیا جائے۔”
ایک اور صارف تیجسوی پراکاش نے سوال اٹھایا:
“اگر ہمارے طیارے بنیادی ایروبیٹک اسٹنٹ بھی نہیں کر سکتے تو کیا ہمارے پائلٹس کو صحیح تربیت دی جا رہی ہے؟”
اسی صارف نے بھارتی ائیر چیف پر تنقید کرتے ہوئے کہا:
“جب ایئر چیف ڈسپلن اور تکنیکی تیاری پر توجہ دینے کے بجائے ڈانس کلپس میں نظر آئیں تو صاف ظاہر ہے کہ قیادت میں کچھ بہت غلط ہے۔”
بھارت میں دفاعی تیاریوں پر بھی سوالات
حادثے کے بعد بھارتی دفاعی تیاریاں، طیاروں کی تکنیکی اپ گریڈیشن اور پائلٹس کی ٹریننگ معیار پر بھی سخت سوالات اٹھنے لگے ہیں۔ دبئی ایئر شو کی تاریخ میں یہ پہلا موقع ہے جب کوئی طیارہ مظاہرے کے دوران تباہ ہوا ہے۔
