نئی دہلی: دہلی کے اندرا گاندھی انٹرنیشنل ایئرپورٹ پر اتوار کے روز ایک بڑا حادثہ ہونے سے بچ گیا، جب آریانا افغان ایئرلائنز کا کابل سے آنے والا مسافر طیارہ غلط رن وے پر لینڈ کر گیا۔ مذکورہ رن وے صرف ٹیک آف کے لیے مختص تھا، تاہم خوش قسمتی سے اس وقت وہاں سے کوئی پرواز روانگی کے لیے موجود نہیں تھی۔
بھارتی میڈیا کے مطابق طیارے کے غلط رن وے پر اُترنے کے واقعے کے بعد ایوی ایشن حکام نے فوری طور پر تحقیقات شروع کر دی ہیں۔ ابتدائی معلومات کے مطابق ایئر ٹریفک کنٹرول (ATC) کی جانب سے پائلٹ کو درست رن وے پر لینڈنگ کی ہدایات دی گئی تھیں اور کنٹرول روم کی طرف سے کسی قسم کی غلطی سامنے نہیں آئی۔
بھارتی ایوی ایشن کے ایک اہلکار کا کہنا ہے کہ جب افغان پائلٹ عبدالمعروف سکندری سے واقعے سے متعلق پوچھ گچھ کی گئی تو انہوں نے تکنیکی خرابی اور حدِ نگاہ کی کمی کو اس غلطی کی وجہ قرار دیا۔ کاک پٹ عملے کے مطابق پائلٹ کو یہ احساس طیارہ رن وے پر اُترنے کے بعد ہوا کہ لینڈنگ غلط رن وے پر ہوئی ہے۔
دوسری جانب اس واقعے کے پس منظر میں افغانستان اور بھارت کے درمیان بڑھتی ہوئی فضائی سرگرمیوں کا بھی ذکر کیا جا رہا ہے۔ پاکستان کے ساتھ سرحدی گزرگاہیں بند ہونے کے بعد طالبان حکام بھارت کے ساتھ فضائی راہداری کو زیادہ فعال بنانے کی کوشش کر رہے ہیں۔
افغانستان کے نائب وزیراعظم برائے اقتصادی امور ملا عبدالغنی برادر نے حال ہی میں افغان تاجروں پر زور دیا ہے کہ وہ تجارت کے لیے پاکستان پر انحصار کم کریں اور متبادل راستے اختیار کریں۔ آریانا افغان ایئرلائنز نے بھی بھارت کے ساتھ درآمد و برآمد کے کرائے کم کرنے کا اعلان کیا ہے، تاکہ تجارتی سرگرمیوں میں اضافہ ہو سکے۔
مزید تحقیقات جاری ہیں اور بھارتی ایوی ایشن حکام طیارے کی غلط لینڈنگ کے تمام پہلوؤں کا جائزہ لے رہے ہیں.
