فیلڈ مارشل عاصم منیر کا کہنا ہے کہ بیرونی حمایت یافتہ دہشت گردی اور پیچیدہ چیلنجز کے باوجود پاک فوج قومی سلامتی کے تحفظ کے لیے پُرعزم ہے۔

پاک فوج کے شعبہ تعلقات عامہ (آئی ایس پی آر) کے مطابق 27 ویں نیشنل سیکیورٹی ورکشاپ کے شرکا نے جی ایچ کیو کا دورہ کیا۔ نیشنل ڈیفنس یونیورسٹی کا یہ اہم پروگرام پارلیمنٹیرینز، اعلیٰ سول و عسکری افسران اور مختلف شعبہ ہائے زندگی سے تعلق رکھنے والے نمائندگان کو ایک پلیٹ فارم پر یکجا کرتا ہے۔

آئی ایس پی آر کے مطابق ورکشاپ کے شرکا کو غیر قانونی سرگرمیوں کے خلاف جاری قومی اقدامات پر تفصیلی بریفنگ دی گئی، جبکہ منشیات کی اسمگلنگ، منظم جرائم پیشہ نیٹ ورکس کے خلاف کارروائیوں، بہتر بارڈر مینجمنٹ اور غیر قانونی غیر ملکیوں کی واپسی کے حوالے سے پیش رفت سے بھی آگاہ کیا گیا۔

اپنے خطاب میں فیلڈ مارشل عاصم منیر نے کہا کہ انٹیلی جنس ادارے اور قانون نافذ کرنے والے ادارے قومی سلامتی کے لیے پیشہ ورانہ مہارت اور عزم کے ساتھ سرگرم ہیں۔ انہوں نے کہا کہ علاقائی صورت حال تیزی سے تبدیل ہو رہی ہے، جیوپولیٹیکل مقابلے میں اضافہ، سرحد پار دہشت گردی اور ہائبرڈ وارفیئر کے اثرات واضح ہیں۔

فیلڈ مارشل نے کہا کہ پاکستان ایک اہم ملک ہے اور عالمی سطح پر اپنی حیثیت کے مطابق مقام حاصل کرنے کے لیے پُرعزم ہے۔ پاک افواج کی پیشہ ورانہ صلاحیت اور جذبے نے عالمی سطح پر ملک کے وقار میں اضافہ کیا ہے، جبکہ قومی یکجہتی ہماری سب سے بڑی طاقت ہے۔

انہوں نے واضح کیا کہ پاکستان آرمی کے لیے ملک کی سرحدی سالمیت، قومی سلامتی اور ہر شہری کا تحفظ اولین ترجیح ہے، اور ان معاملات میں کسی قسم کا سمجھوتہ نہیں کیا جائے گا۔ ان کا کہنا تھا کہ “ہم ان شاء اللہ دشمنوں کے تمام مذموم عزائم کو ناکام بنائیں گے۔”

فیلڈ مارشل عاصم منیر نے وفاقی و صوبائی حکومتوں کے ساتھ مکمل تعاون کے عزم کو دہراتے ہوئے کہا کہ دیرپا امن، استحکام اور خوشحالی کے لیے مربوط قومی کوششیں اور ادارہ جاتی ہم آہنگی ناگزیر ہیں.