اسلام آباد: جوائنٹ اسٹاف ہیڈکوارٹرز میں چیئرمین جوائنٹ چیفس آف اسٹاف کمیٹی جنرل ساحر شمشاد مرزا کے اعزاز میں پروقار الوداعی تقریب کا انعقاد کیا گیا۔ سبکدوش ہونے والے چیئرمین کو تینوں افواج کے چاق و چوبند دستے نے گارڈ آف آنر پیش کیا۔
آئی ایس پی آر کے مطابق تقریب میں سابق چیئرمینز جوائنٹ چیفس آف اسٹاف کمیٹی، پاک فوج، پاک بحریہ اور پاک فضائیہ کے سینئر افسران نے شرکت کی۔
فوج کے ترجمان کے مطابق جنرل ساحر شمشاد مرزا نے پاک فوج میں 40 سال کی شاندار خدمات سرانجام دیں۔ اپنے الوداعی خطاب میں انہوں نے کہا کہ اللہ تعالیٰ نے انہیں لگن، پیشہ ورانہ مہارت اور خلوص نیت کے ساتھ اپنی ذمہ داریاں ادا کرنے کی توفیق دی۔
انہوں نے مادرِ وطن کے دفاع میں پاک فوج کی لازوال قربانیوں کو زبردست خراجِ تحسین پیش کیا اور شہداء و ان کے اہل خانہ کو بھی خراجِ عقیدت پیش کیا۔
جنرل ساحر شمشاد مرزا کا کہنا تھا کہ مضبوط قومی دفاع ہی قومی سلامتی کا بنیادی ستون ہے۔ انہوں نے یقین ظاہر کیا کہ پاکستان کا دفاع ناقابلِ تسخیر ہے اور بہادر افسران و جوان دفاعِ وطن کو مزید مستحکم بنانے کے لیے ہر دم تیار ہیں۔
تقریب کا اختتام جنرل ساحر شمشاد مرزا کی پیشہ ورانہ خدمات اور ملک کے دفاع کے لیے ان کی گرانقدر کاوشوں کو خراج تحسین پیش کرنے کے ساتھ ہوا.
