لاہور: وزیراعلیٰ پنجاب مریم نواز شریف نے شالیمار ٹاؤن میں مریم نواز سنٹر آف ایکسی لینس فار سپیشل ایجوکیشن سٹوڈنٹس کا دورہ کیا اور لنچ ٹائم بیل بجا کر سی ایم سکول میل پروگرام برائے سپیشل ایجوکیشن سٹوڈنٹس کا باضابطہ افتتاح کردیا۔
وزیراعلیٰ نے سینٹر کا افتتاح بھی کیا اور مختلف کلاس رومز، لیبز، تھراپی رومز اور ایکٹیویٹی ایریاز کا تفصیلی معائنہ کیا۔ اس موقع پر انہوں نے سپیشل بچوں کے لئے دستیاب جدید سہولیات کا جائزہ لیا اور انتظامات پر اطمینان کا اظہار کیا۔
سپیشل بچوں سے اظہار شفقت — کیش پرائز اور تحائف
دورے کے دوران وزیراعلیٰ مریم نواز شریف نے سپیشل اولمپین علی رضا، شاہ گلو حیات اور بلائنڈ کرکٹ کے کھلاڑی شاہزیب کو کیش پرائز بھی دیئے۔
انہوں نے سپیشل بچوں سے محبت بھرے انداز میں ملاقات کی، انہیں ملک پیک اور بسکٹ پیش کیے جبکہ ایک ننھی سپیشل بچی نے محبت سے وزیراعلیٰ کو بھی بسکٹ کھلائے۔
وزیراعلیٰ نے بچوں کے ساتھ کلاس روم میں بیٹھ کر وائٹ بورڈ پر الفاظ لکھے جن کے درست جوابات بچوں نے فوری دیئے۔ انہوں نے بریل ریڈنگ کرنے والے بچوں کے ساتھ بھی وقت گزارا۔
سپیشل بچوں کی مہارتوں میں بھرپور دلچسپی
مریم نواز شریف نے سینٹر میں سپیشل بچوں کی تیار کردہ دستکاریاں، پینٹنگز، اور ڈیزائن کردہ لیٹر ہیڈز میں گہری دلچسپی ظاہر کی۔ ایک سپیشل بچی نے انہیں فریم شدہ تصویر بھی تحفے میں پیش کی۔
ننھے سپیشل ہیرو انس نے وزیراعلیٰ اور معاون خصوصی ثانیہ عاشق کے ساتھ فوٹو بھی بنوائی۔
وزیراعلیٰ تقریب کے دوران سپیشل بچوں کے درمیان بیٹھ گئیں اور خود ہی وہیل چیئر پر بیٹھے بچے کو آگے لے آئیں۔ بعدازاں انہوں نے بچوں کو سٹیج پر بلا کر سکول میل پروگرام کا افتتاح کرایا۔
خصوصی کلاس رومز اور سہولیات کا معائنہ
وزیراعلیٰ نے ای سی ای کلاس روم، فزیکل ایکٹیویٹی روم، سپیچ اینڈ لینگویج تھراپی روم، پی ڈی کلاس روم، سمارٹ کلاس روم اور کمپیوٹر لیب کا بھی تفصیلی معائنہ کیا۔
مریم نواز شریف نے سینٹر کے 8 سپیشل بچوں کو روزگار ملنے پر مسرت کا اظہار بھی کیا۔
پنجاب میں سپیشل ایجوکیشن مراکز کا جال — بریفنگ
اس موقع پر معاون خصوصی برائے سپیشل ایجوکیشن ثانیہ عاشق نے بریفنگ دیتے ہوئے بتایا کہ:
• پنجاب کے 28 اضلاع میں مریم نواز سنٹر آف ایکسی لینس قائم کیے جاچکے ہیں
• صوبے میں 6 ہزار سے زائد سپیشل بچوں کے نئے داخلے کیے گئے ہیں
• وزیراعلیٰ کے ویژن کے مطابق سپیشل ایجوکیشن مراکز کو جدید خطوط پر ری ویمپ کیا جا رہا ہے
وزیراعلیٰ کے اس دورے کو سپیشل بچوں کی فلاح، تعلیم اور بہتر نگہداشت کے لیے ایک اہم سنگِ میل قرار دیا جا رہا ہے.
