کراچی: سندھ اسمبلی نے بھارتی وزیر دفاع راج ناتھ سنگھ کے سندھ سے متعلق اشتعال انگیز بیان کے خلاف متفقہ مذمتی قرارداد منظور کرلی۔
پیپلز پارٹی کے رکن مکیش کمار چاولہ نے مذمتی قرارداد پیش کی جس میں بھارتی وزیر دفاع کے بیان کو ناقابلِ قبول، اشتعال انگیز اور خطے کے امن کے لیے خطرہ قرار دیا گیا۔
وزیراعلیٰ سندھ مراد علی شاہ نے قرارداد پر اظہارِ خیال کرتے ہوئے کہا کہ بھارت پاکستان سے اپنی بدترین شکست نہیں بھولا، یہی وجہ ہے کہ بھارتی قیادت بوکھلاہٹ کا شکار ہے۔
انہوں نے کہا:
“بھارتی وزیر دفاع کی گیدڑ بھپکیاں کبھی کامیاب نہیں ہوں گی۔ ان کا بیان کھسیانی بلی کھمبا نوچے کے مترادف ہے۔ نہ کوئی سندھ کو پاکستان سے الگ کرسکتا ہے، نہ جغرافیہ بدل سکتا ہے۔ سندھ متحد ہے اور ہمیشہ پاکستان کے ساتھ رہے گا۔”
اپوزیشن لیڈر علی خورشیدی نے بھی قرارداد کی بھرپور حمایت کی، جس کے بعد قرارداد اتفاقِ رائے سے منظور کرلی گئی۔
اس موقع پر ایوان نے گورنر سندھ کی جانب سے مسترد کردہ بورڈز آف انٹرمیڈیٹ اینڈ سیکنڈری ایجوکیشن 2025 ترمیمی بل بھی دوبارہ منظور کرلیا، جو اب منظوری کے لیے دوبارہ گورنر کو ارسال ہوگا.
