اسلام آباد میں صدرِ مملکت آصف علی زرداری نے نیشنل ڈیفنس یونیورسٹی (این ڈی یو) کا دورہ کیا، جہاں انہوں نے 27ویں نیشنل سکیورٹی ورکشاپ کے شرکاء سے خصوصی خطاب کیا۔
آئی ایس پی آر کے مطابق ورکشاپ میں پارلیمنٹیرینز، سینئر سول و ملٹری افسران کے ساتھ ساتھ تعلیمی و سماجی شعبوں سے تعلق رکھنے والے نمائندوں نے بھی شرکت کی۔ ورکشاپ کا مقصد قومی سلامتی کے حوالے سے آگاہی اور سمجھ کو فروغ دینا تھا۔
آئی ایس پی آر کے مطابق صدرِ مملکت نے ورکشاپ مکمل کرنے پر شرکاء کو مبارکباد دی اور قومی سلامتی کے متعلق ان کی دلچسپی اور لگن کو سراہا۔ صدر نے اپنے خطاب میں کہا کہ نیشنل سکیورٹی ورکشاپ مکالمے کو فروغ دینے والے اہم قومی پلیٹ فارمز میں سے ہے، جو ملک کو درپیش موجودہ سکیورٹی چیلنجز سے مؤثر انداز میں نمٹنے میں مدد فراہم کرتی ہے۔
بیان کے مطابق نیشنل سکیورٹی ورکشاپ نہ صرف ادارہ جاتی صلاحیت میں اضافے کا ذریعہ ہے بلکہ قومی سلامتی کے لیے مربوط حکمتِ عملی تیار کرنے میں بھی بنیادی کردار ادا کرتی ہے۔
اس موقع پر صدرِ مملکت نے باخبر قیادت، قومی یکجہتی اور مربوط پالیسی سازی کی ضرورت پر زور دیا۔ اختتامی تقریب کے اختتام پر انہوں نے فارغ التحصیل شرکاء میں اسناد بھی تقسیم کیں.
