اسلام آباد: وزیراعظم پاکستان شہباز شریف نے بھارت کے خلاف فائنل میں شاندار کامیابی پر قومی انڈر 19 کرکٹ ٹیم کے ہر کھلاڑی کے لیے ایک، ایک کروڑ روپے انعام کا اعلان کیا ہے۔
ایشین انڈر 19 چیمپئن ٹیم کے اعزاز میں وزیراعظم کی جانب سے استقبالیہ دیا گیا، جس میں شہباز شریف نے تمام کھلاڑیوں کا خود استقبال کیا۔ اس موقع پر چیئرمین پاکستان کرکٹ بورڈ محسن نقوی، وفاقی وزرا اور کابینہ کے ارکان بھی وزیراعظم کے ہمراہ موجود تھے۔
وزیراعظم نے فرداً فرداً تمام کھلاڑیوں سے مصافحہ کیا اور بھارت کے خلاف شاندار کارکردگی پر انہیں سراہا۔ شہباز شریف نے کہا کہ کھلاڑیوں نے دنیا بھر میں پاکستان کا نام روشن کیا ہے اور بھارت کو بدترین شکست دینے پر پوری ٹیم مبارکباد کی مستحق ہے۔ انہوں نے کہا کہ فائنل میں ٹیم نے جس جوش و جذبے اور عزم کا مظاہرہ کیا، اس کی مثال نہیں ملتی اور پوری قوم کو نوجوان کھلاڑیوں پر فخر ہے۔
وزیراعظم نے کھلاڑیوں سے امید ظاہر کی کہ وہ اپنی کارکردگی میں تسلسل برقرار رکھیں گے اور مستقبل قریب میں انڈر 19 ورلڈ کپ بھی پاکستان کے نام کریں گے۔ انہوں نے چیئرمین پی سی بی محسن نقوی کو ہدایت کی کہ تمام کھلاڑیوں کا بھرپور خیال رکھا جائے اور انہیں ہر ممکن سہولت فراہم کی جائے۔
شہباز شریف نے مزید کہا کہ ان نوجوانوں میں سے کئی کھلاڑی جلد پاکستان کی قومی ٹیم کا حصہ بنیں گے۔ اس موقع پر وزیراعظم نے سمیر منہاس کو شاندار کارکردگی پر خصوصی طور پر سراہا اور انہیں ٹیم کا ہیرو قرار دیا۔ وزیراعظم نے پی سی بی کے امور احسن انداز میں چلانے پر محسن نقوی کو بھی مبارکباد دی۔
استقبالیے کے بعد کھلاڑیوں کے اعزاز میں پرتکلف ظہرانہ دیا گیا، جہاں وزیراعظم نے ٹیم کے ساتھ کھانا کھایا اور فرداً فرداً کھلاڑیوں سے غیر رسمی گفتگو بھی کی۔ کھلاڑیوں نے بھرپور عزت افزائی پر وزیراعظم اور عوام پاکستان کا شکریہ ادا کیا اور بہترین کارکردگی کے تسلسل کو برقرار رکھنے کے عزم کا اعادہ کیا۔
قومی کرکٹ ٹیم کے سابق کپتان اور پاکستان انڈر 19 ٹیم کے مینٹور سرفراز احمد نے اس موقع پر کہا کہ وزیراعظم کی جانب سے فی کھلاڑی ایک کروڑ روپے انعام کا اعلان نوجوان کھلاڑیوں کے لیے بڑا حوصلہ افزا قدم ہے، یہ پلیئرز مستقبل میں ملک کا نام مزید روشن کریں گے۔
