اسلام آباد: برطانوی جریدے فنانشل ٹائمز نے چیف آف ڈیفنس فورسز فیلڈ مارشل عاصم منیر کی متاثر کن شخصیت اور قیادت کا اعتراف کرتے ہوئے انہیں بدلتے عالمی نظام میں ایک مؤثر اسٹریٹجک رہنما قرار دیا ہے۔
فنانشل ٹائمز نے اپنی رپورٹ میں فیلڈ مارشل عاصم منیر کو کثیر الجہتی خارجہ پالیسی کا ماہر قرار دیتے ہوئے لکھا کہ موجودہ عالمی سیاست میں درمیانی طاقتوں (مڈل پاورز) کے لیے ایک نیا مگر پیچیدہ دور شروع ہو چکا ہے، جہاں توازن قائم رکھنا ایک بڑا چیلنج بن گیا ہے۔
رپورٹ کے مطابق فیلڈ مارشل عاصم منیر کو درمیانی طاقتوں کے سب سے کامیاب ملٹی الائنرز (Multi-aligners) میں شمار کیا جاتا ہے۔ جریدے کا کہنا ہے کہ سابق امریکی صدر ڈونلڈ ٹرمپ کے ساتھ سب سے بہتر ہم آہنگی قائم کرنے کا اعزاز بھی پاکستان کے عسکری سربراہ فیلڈ مارشل عاصم منیر کو حاصل رہا۔
فنانشل ٹائمز نے پاکستان کی سفارتکاری کو مڈل پاورز کی کامیاب مثال قرار دیتے ہوئے لکھا کہ پاکستانی قیادت نے واشنگٹن، بیجنگ، ریاض اور تہران کے ساتھ بیک وقت مؤثر روابط برقرار رکھے۔ رپورٹ کے مطابق فیلڈ مارشل عاصم منیر نے بدلتے عالمی حالات میں پاکستان کی خارجہ پالیسی کو نہایت مؤثر انداز میں آگے بڑھایا۔
برطانوی جریدے کا کہنا ہے کہ ٹرمپ کے ساتھ بروقت خوش گفتاری اور نرم سفارتی رویہ پاکستان کے لیے سودمند ثابت ہوا، جس کے نتیجے میں پاکستان کو سفارتی کامیابیاں حاصل ہوئیں جبکہ بھارت کو مایوسی کا سامنا کرنا پڑا۔ رپورٹ میں کہا گیا کہ بھارت کے لیے مڈل پاور کی حکمتِ عملی توقع سے کہیں زیادہ مشکل ثابت ہوئی۔
فنانشل ٹائمز کے مطابق بھارت بدلتے عالمی حالات اور ٹرمپ کے اندازِ سیاست سے ہم آہنگ نہ ہو سکا، جس کے باعث اسے درمیانی طاقت کی سفارتکاری میں نمایاں مشکلات کا سامنا کرنا پڑ رہا ہے۔
