اسلام آباد: پاکستان نے جمہوریہ یمن میں امن اور استحکام کے قیام کی کوششوں کی بھرپور حمایت کا اظہار کرتے ہوئے کہا ہے کہ وہ یمن میں حالیہ پیشرفت پر گہری نظر رکھے ہوئے ہے۔
ترجمان دفتر خارجہ کے مطابق پاکستان یمن میں امن و استحکام کے لیے سعودی عرب کی جانب سے کی جانے والی سفارتی کوششوں کی مکمل حمایت کرتا ہے اور اس ضمن میں متحدہ عرب امارات کے کردار کو بھی سراہتا ہے۔
ترجمان نے کہا کہ پاکستان نے تمام فریقین پر زور دیا ہے کہ وہ جامع، مذاکراتی اور سیاسی حل کے لیے تعمیری انداز اور نیک نیتی کے ساتھ بات چیت کریں۔ پاکستان یمن کی وحدت اور علاقائی سالمیت کے احترام کی اہمیت پر بھی زور دیتا ہے۔
دفتر خارجہ کے ترجمان کے مطابق پاکستان کو امید ہے کہ یمنی فریقین کسی بھی ایسے یکطرفہ اقدامات سے گریز کریں گے جو صورتحال میں مزید کشیدگی کا باعث بن سکتے ہیں۔
ترجمان نے مزید کہا کہ پاکستان کو توقع ہے کہ جاری سفارتی کوششیں یمن میں دیرپا امن کے حصول کے لیے ٹھوس اقدامات کی صورت اختیار کریں گی، جبکہ پاکستان یمنی عوام کی تکالیف کے خاتمے کے لیے بھی پرامید ہے۔
