سابق آسٹریلوی ٹیسٹ کرکٹر ڈیمین مارٹن میننجائٹس کے باعث مصنوعی کومہ میں منتقل

آسٹریلیا کے سابق ٹیسٹ کرکٹر ڈیمین مارٹن کو میننجائٹس کی تشخیص کے بعد مصنوعی کومہ میں منتقل کر دیا گیا ہے۔ 54 سالہ سابق بلے باز جمعے کے روز اچانک بیمار پڑ گئے تھے اور اس وقت کوئنز لینڈ کے ایک اسپتال میں زیرِ علاج ہیں۔

کرکٹ آسٹریلیا کے چیف ایگزیکٹو ٹوڈ گرین برگ نے ڈیمین مارٹن کی بیماری پر افسوس کا اظہار کرتے ہوئے ان کی جلد صحتیابی کے لیے نیک تمناؤں کا اظہار کیا ہے۔

ڈیمین مارٹن کے قریبی دوست اور سابق ساتھی کرکٹر ایڈم گلکرسٹ نے خاندان کی جانب سے تصدیق کی ہے کہ مارٹن کو بہترین ممکنہ طبی سہولیات فراہم کی جا رہی ہیں۔ اہلِ خانہ کو امید ہے کہ آئندہ چند دنوں میں انہیں کومے سے نکال لیا جائے گا۔

ڈیمین مارٹن نے 1992 سے 2006 کے دوران آسٹریلیا کی نمائندگی کرتے ہوئے 67 ٹیسٹ میچز کھیلے۔ وہ چار ایشز سیریز کا حصہ رہے اور 2006 میں تیسرے ٹیسٹ سے قبل اچانک کرکٹ سے ریٹائرمنٹ کا اعلان کیا تھا۔ وہ آسٹریلیا کی دو ورلڈ کپ جیتنے والی ٹیموں کے بھی رکن رہے۔

اعداد و شمار کے مطابق ڈیمین مارٹن نے ٹیسٹ کرکٹ میں 4,406 رنز اسکور کیے، ان کی اوسط 46.37 رہی۔ ون ڈے کرکٹ میں انہوں نے 208 میچز میں 5,346 رنز بنائے، اوسط 40 رہی، جن میں 5 سنچریاں اور 37 نصف سنچریاں شامل ہیں۔

واضح رہے کہ 2003 کے ورلڈ کپ فائنل میں بھارت کے خلاف انہوں نے ٹوٹی ہوئی انگلی کے باوجود ناقابلِ شکست 88 رنز کی شاندار اننگز کھیل کر آسٹریلیا کو فتح دلائی تھی۔ اسی برس وہ انگلش کاؤنٹی یارکشائر کی جانب سے بطور اوورسیز کھلاڑی بھی کھیلے تھے.