کراچی کے ایم اے جناح روڈ پر واقع گل پلازہ میں پیش آنے والے افسوسناک آتشزدگی کے واقعے کے بعد عوام کی سہولت اور متاثرہ خاندانوں کی فوری رہنمائی کے لیے حکومتِ سندھ نے ہیلپ لائنز قائم کر دی ہیں۔ آتشزدگی کے نتیجے میں جانی و مالی نقصان کے پیش نظر متعلقہ اداروں کو ہدایت دی گئی ہے کہ متاثرین کو ہر ممکن تعاون فراہم کیا جائے۔
حکومتِ سندھ کی جانب سے جاری کردہ اعلامیے کے مطابق گل پلازہ آتشزدگی سے متعلق کسی بھی قسم کی معلومات، گمشدہ افراد کی اطلاع یا متاثرین کے بارے میں تفصیلات ڈپٹی کمشنر ساؤتھ کے قائم کردہ ہیلپ لائن نمبرز پر فراہم کی جا سکتی ہیں۔ شہری درج ذیل نمبرز پر رابطہ کر سکتے ہیں:
0313-5048048، 021-99206372، 021-99205625
انتظامیہ نے واضح کیا ہے کہ اگر کسی شخص کا کوئی عزیز یا دوست گل پلازہ آتشزدگی کے بعد لاپتا ہے تو اس کی تفصیلات فوری طور پر ان نمبرز پر فراہم کی جائیں تاکہ ریکارڈ مرتب کر کے تلاش کے عمل کو مؤثر بنایا جا سکے۔
دوسری جانب حکومتِ سندھ کی ہدایت پر ساؤتھ زون پولیس نے بھی عوام کی سہولت اور بروقت رہنمائی کے لیے علیحدہ ہیلپ لائن قائم کر دی ہے۔ ساؤتھ زون پولیس کے مطابق گل پلازہ آتشزدگی سے متعلق کسی بھی قسم کی اطلاع، متاثرہ یا گمشدہ افراد کے بارے میں معلومات درج ذیل نمبرز پر دی جا سکتی ہیں:
021-99205691، 021-99205670، 021-99201196
ڈی آئی جی ساؤتھ کی جانب سے شہریوں کو یقین دہانی کرائی گئی ہے کہ موصول ہونے والی ہر اطلاع پر فوری اور مؤثر کارروائی کی جائے گی، جبکہ گمشدہ افراد کی تلاش اور متاثرین کی مدد کو اولین ترجیح دی جائے گی۔
واضح رہے کہ گل پلازہ میں لگنے والی آگ کو تیسرے درجے کی آتشزدگی قرار دیا گیا ہے، جس کے باعث عمارت کے کئی حصے متاثر ہوئے اور متعدد افراد کے لاپتا ہونے کی اطلاعات موصول ہو رہی ہیں۔ ریسکیو اور امدادی ادارے بدستور موقع پر موجود ہیں اور صورتحال پر قابو پانے کے لیے کارروائیاں جاری ہے۔
