اسلام آباد / کراچی: ملک کے مختلف علاقوں میں ہونے والی شدید برفباری نے معمولاتِ زندگی کو بری طرح متاثر کر دیا ہے۔ بالائی علاقوں میں کئی کئی فٹ برف پڑنے کے باعث رابطہ سڑکیں بند، بجلی کا نظام درہم برہم اور سینکڑوں افراد مشکلات کا شکار ہیں، جبکہ متعدد مقامات پر ریسکیو آپریشن جاری ہے۔
آزاد کشمیر میں صورتحال سنگین
آزاد کشمیر کے بالائی علاقوں وادی نیلم، سدھنوتی، باغ، ہٹیاں بالا، اٹھ مقام اور اپر نیلم میں گزشتہ رات سے مسلسل برفباری کا سلسلہ جاری ہے۔ شدید برفباری کے باعث ضلع حویلی میں ایمبولینس سمیت تقریباً 25 گاڑیاں برف میں پھنس گئیں۔ پاک فوج نے بروقت کارروائی کرتے ہوئے 32 مسافروں کو محفوظ مقام پر منتقل کر دیا، جبکہ ایمبولینس میں موجود دو میتیں بھی نکال لی گئیں۔ ان گاڑیوں میں مجموعی طور پر 100 کے قریب افراد سوار تھے۔
مظفرآباد میں کئی سال بعد ہونے والی برفباری نے موسم کو خوشگوار تو بنا دیا، تاہم وادی نیلم میں شدید برفباری کے باعث تین مکانات زمین بوس ہو گئے۔ برفباری اور لینڈ سلائیڈنگ سے اہم شاہراہیں بند ہو گئیں، جبکہ بجلی کے متعدد پولز گرنے اور تاریں ٹوٹنے کے باعث کئی علاقوں میں گزشتہ 24 گھنٹوں سے بجلی کی فراہمی معطل ہے۔
خیبرپختونخوا میں برف اور مشکلات
خیبرپختونخوا میں وقفے وقفے سے برفباری کا سلسلہ جاری ہے۔ وادی کاغان میں شدید برفباری کے بعد رابطہ سڑکیں بند ہونے پر انتظامیہ نے سیاحوں کا داخلہ روک دیا اور سیاحوں کو بالاکوٹ میں ہی روک لیا گیا۔ دیربالا، کمراٹ، لواری ٹنل اور باجوڑ میں بھی برفباری کے باعث راستے بند ہیں۔
ملاکنڈ میں کئی برس بعد برفباری دیکھنے میں آئی، جہاں بعض مقامات پر درخت گرنے سے سڑکیں متاثر ہوئیں۔ ضلع خیبر میں برفباری کے باعث پھنسے افراد کو نکالنے کا عمل جاری ہے۔ ڈپٹی کمشنر خیبر کے مطابق متاثرہ افراد کو پائندہ چینہ اسکول اور ہاسٹل منتقل کر دیا گیا ہے۔ شانگلہ ٹاپ میں 22 گھنٹوں سے برف میں پھنسے چار سیاحوں کو بھی کامیابی سے ریسکیو کر لیا گیا۔
گلگت بلتستان میں شدید سردی اور بند راستے
گلگت بلتستان میں شدید برفباری نے حالات مزید مشکل بنا دیے ہیں۔ چلاس اور اپر کوہستان میں برفباری اور لینڈ سلائیڈنگ کے باعث شاہراہِ قراقرم مختلف مقامات پر بند کر دی گئی، جس کے نتیجے میں سیکڑوں مسافر اور مال بردار گاڑیاں راستے میں پھنس گئیں۔
استور میں شدید برفباری کے باعث نظامِ زندگی مکمل طور پر مفلوج ہو چکا ہے اور ضلع کا ملک بھر سے زمینی رابطہ منقطع ہو گیا ہے۔ راما میڈوز، دیوسائی، نانگا پربت اور برزل ٹاپ میں 5 سے 6 فٹ تک برف پڑ چکی ہے، جبکہ مشرف چوک میں برفانی تودہ گرنے سے مرکزی سڑک بلاک ہو گئی۔
ہنزہ اور نگر میں بھی برفباری کے باعث رابطہ سڑکیں بند ہیں، جبکہ وادی چیپورسن میں خیموں میں مقیم زلزلہ متاثرین کو شدید سردی کے باعث سخت مشکلات کا سامنا ہے۔
انتظامیہ اور ریسکیو ادارے متاثرہ علاقوں میں سڑکوں کی بحالی اور پھنسے افراد کو محفوظ مقامات پر منتقل کرنے کے لیے سرگرم ہیں، تاہم مزید برفباری کے پیشِ نظر شہریوں کو غیر ضروری سفر سے گریز کی ہدایت کی گئی ہے۔
