خیبر: ضلع خیبر کی تحصیل باڑہ کے علاقے شنکو میں چار افراد کی لاشیں ملنے سے علاقے میں خوف و ہراس پھیل گیا ہے۔ پولیس کے مطابق مقتولین کو فائرنگ کر کے قتل کیا گیا، جبکہ لاشیں کچھ دیر قبل برآمد ہوئیں۔
ڈسٹرکٹ پولیس آفیسر (ڈی پی او) خیبر کا کہنا ہے کہ چاروں افراد کو قریب سے فائرنگ کا نشانہ بنایا گیا، جس کے نتیجے میں وہ موقع پر ہی جان کی بازی ہار گئے۔ واقعے کی اطلاع ملتے ہی پولیس کی بھاری نفری موقع پر پہنچ گئی اور علاقے کو گھیرے میں لے کر شواہد اکٹھے کیے گئے۔
پولیس کے مطابق لاشوں کو قانونی کارروائی مکمل کرنے کے بعد پوسٹ مارٹم کے لیے قریبی اسپتال منتقل کر دیا گیا ہے، جبکہ واقعے کی مختلف پہلوؤں سے تحقیقات جاری ہیں۔ حکام کا کہنا ہے کہ قتل کی فوری وجوہات تاحال سامنے نہیں آ سکیں، تاہم ابتدائی شواہد کی بنیاد پر تفتیش کا دائرہ وسیع کر دیا گیا ہے۔
پولیس حکام کے مطابق مقتولین کی شناخت کا عمل بھی جاری ہے اور قریبی علاقوں میں معلومات اکٹھی کی جا رہی ہیں تاکہ مرنے والوں کا پس منظر اور ممکنہ دشمنیوں کا سراغ لگایا جا سکے۔
واقعے کے بعد مقامی افراد میں شدید تشویش پائی جا رہی ہے، جبکہ پولیس نے یقین دہانی کرائی ہے کہ ذمہ دار عناصر کو جلد قانون کے کٹہرے میں لایا جائے گا۔
