چیئرمین پاکستان کرکٹ بورڈ (پی سی بی) محسن نقوی نے آئی سی سی کے ساتھ ہونے والے حالیہ مذاکرات پر وضاحت دیتے ہوئے کہا ہے کہ پاکستان کا مقصد کسی ذاتی فائدے کا حصول نہیں بلکہ بنگلادیش کے ساتھ ہونے والی ناانصافی کو اجاگر کرنا اور اس کے مطالبات کی حمایت کرنا تھا۔ ان کا کہنا تھا کہ مذاکرات میں پاکستان نے بنگلادیش کے سوا کوئی اضافی شرط نہیں رکھی اور تمام اقدامات خالصتاً اصولی بنیادوں پر کیے گئے۔
میڈیا سے گفتگو کرتے ہوئے محسن نقوی نے کہا کہ پاکستان نے ہمیشہ کرکٹ میں انصاف اور برابری کے اصولوں کی حمایت کی ہے۔ ان کے مطابق بنگلادیش کے مطالبات کو تسلیم کروانے کے لیے سفارتی سطح پر کوششیں کی گئیں اور بالآخر ان کے کئی مطالبات مان لیے گئے، جو کرکٹ بورڈز کے درمیان تعاون اور ہم آہنگی کی مثبت مثال ہے۔
یاد رہے کہ دو روز قبل لاہور میں آئی سی سی، پی سی بی اور بنگلادیش کرکٹ بورڈ (بی سی بی) کے درمیان اہم مذاکرات ہوئے تھے۔ یہ بات چیت پاکستان کے ٹی ٹوئنٹی ورلڈکپ میں بھارت کے خلاف ممکنہ بائیکاٹ سے متعلق سامنے آنے والی صورتحال کے تناظر میں کی گئی تھی۔ مذاکرات میں آئی سی سی کے ڈپٹی چیئرمین عمران خواجہ، چیئرمین پی سی بی محسن نقوی اور بی سی بی کے صدر امین الاسلام شریک ہوئے تھے۔
بعد ازاں آئی سی سی کی جانب سے جاری اعلامیے میں بتایا گیا کہ بنگلادیش کی ٹی ٹوئنٹی ورلڈکپ 2026 میں عدم شرکت پر کوئی جرمانہ عائد نہیں کیا جائے گا۔ مزید یہ کہ بنگلادیش کو آئندہ برسوں میں آئی سی سی ایونٹ کی میزبانی بھی دی جائے گی، جس کے تحت بنگلادیش کرکٹ بورڈ 2028 سے 2031 کے دوران ایک عالمی ایونٹ کی میزبانی کرے گا۔
ذرائع کے مطابق بعد میں سری لنکن صدر اور بنگلادیش کرکٹ بورڈ کی جانب سے پاکستان سے بھارت کے خلاف میچ کھیلنے کی درخواست کی گئی، جس کے بعد حکومتی سطح پر مشاورت کے نتیجے میں قومی ٹیم کو روایتی حریف کے خلاف میچ کھیلنے کی اجازت دے دی گئی۔
کرکٹ حلقوں کا کہنا ہے کہ حالیہ پیش رفت نہ صرف کرکٹ سفارت کاری کی اہمیت کو اجاگر کرتی ہے بلکہ خطے میں کھیل کے ذریعے تعلقات بہتر بنانے کی کوششوں کی بھی عکاسی کرتی ہے۔
