احمد آباد: آئی سی سی ٹی 20 ورلڈکپ کے گروپ ڈی کے ایک نہایت سنسنی خیز میچ میں جنوبی افریقا نے افغانستان کو دوسرے سپر اوور میں 4 رنز سے شکست دے کر اہم کامیابی حاصل کر لی۔ دونوں ٹیموں کے درمیان کانٹے دار مقابلہ دیکھنے کو ملا جس کا فیصلہ مقررہ اوورز کے بعد سپر اوورز میں ہوا۔
ٹاس اور پہلی اننگز
احمد آباد میں کھیلے گئے اس میچ میں افغانستان کے کپتان راشد خان نے ٹاس جیت کر جنوبی افریقا کو پہلے بیٹنگ کی دعوت دی۔ پروٹیز کی جانب سے کوئنٹن ڈی کوک اور ایڈم مارکرم نے اننگز کا آغاز کیا، تاہم مارکرم صرف 12 کے مجموعے پر فضل حق فاروقی کی گیند پر کیچ آؤٹ ہوگئے۔
ابتدائی نقصان کے بعد ڈی کوک اور ریکلٹن نے ذمہ دارانہ بیٹنگ کرتے ہوئے ٹیم کو مستحکم کیا۔ دونوں بیٹرز نے جارحانہ انداز اپناتے ہوئے اپنی نصف سنچریاں مکمل کیں۔ ریکلٹن نے 61 جبکہ ڈی کوک نے 59 رنز بنائے۔ بعد ازاں ڈیوالڈ بریوس 23 اور ڈیوڈ ملر 20 رنز بنا کر نمایاں رہے۔ افغانستان کی جانب سے عظمت اللہ عمرزئی نے 3 اور راشد خان نے 2 وکٹیں حاصل کیں۔ جنوبی افریقا نے مقررہ 20 اوورز میں 187 رنز اسکور کیے۔
افغانستان کی اننگز
187 رنز کے تعاقب میں افغانستان کی جانب سے رحمان اللہ گرباز اور ابراہیم زادران نے اننگز کا آغاز کیا۔ گرباز نے شاندار بیٹنگ کا مظاہرہ کرتے ہوئے 42 گیندوں پر 87 رنز کی دھواں دھار اننگز کھیلی، جس میں 7 چھکے اور 4 چوکے شامل تھے۔ ایک موقع پر افغانستان مضبوط پوزیشن میں نظر آ رہا تھا، تاہم آخری اوورز میں 13 گیندوں کے دوران 5 وکٹیں گرنے سے ٹیم دباؤ میں آگئی اور پوری افغان ٹیم 20ویں اوور میں 187 رنز بنا کر آؤٹ ہوگئی۔ جنوبی افریقا کی جانب سے لنگی نگیڈی نے 3 وکٹیں حاصل کیں۔
سنسنی خیز سپر اوورز
میچ برابر ہونے کے بعد فیصلہ سپر اوورز میں ہوا۔ پہلے سپر اوور میں افغانستان نے 17 رنز بنائے، جواب میں جنوبی افریقا بھی 17 رنز ہی بنا سکا، جس کے باعث مقابلہ دوسرے سپر اوور تک جا پہنچا۔
دوسرے سپر اوور میں جنوبی افریقا نے پہلے بیٹنگ کرتے ہوئے 23 رنز اسکور کیے۔ افغان ٹیم ہدف کے تعاقب میں 19 رنز بنا سکی اور یوں پروٹیز نے 4 رنز سے کامیابی اپنے نام کر لی۔
گروپ صورتحال
یاد رہے کہ افغانستان کو اپنے پہلے میچ میں نیوزی لینڈ کے خلاف شکست کا سامنا کرنا پڑا تھا جبکہ جنوبی افریقا نے اپنے ابتدائی میچ میں کینیڈا کو 57 رنز سے ہرایا تھا۔ اس فتح کے ساتھ جنوبی افریقا نے گروپ ڈی میں اپنی پوزیشن مزید مضبوط کر لی ہے۔
