عالمی توانائی منڈی میں حالیہ کشیدگی کے باعث روسی تیل کی طلب میں نمایاں اضافہ دیکھنے میں آ رہا ہے۔ امریکا اور اسرائیل کے ایران پر حملوں کے بعد خلیج میں پیدا ہونے والی جنگی صورتحال اور آبنائے ہرمز کی ممکنہ بندش کے خدشات نے عالمی منڈی میں تیل کی سپلائی کو متاثر کیا ہے، جس کے نتیجے میں روسی تیل کی مانگ بڑھ گئی ہے۔
بین الاقوامی میڈیا رپورٹس کے مطابق موجودہ صورتحال میں روس دنیا کو یومیہ تقریباً 15 کروڑ ڈالر مالیت کا تیل فروخت کر رہا ہے۔ توانائی کے ماہرین کا کہنا ہے کہ خلیجی خطے میں کشیدگی اور اہم بحری راستوں پر خطرات کے باعث کئی ممالک نے متبادل سپلائی کے طور پر روسی تیل کی خریداری بڑھا دی ہے۔
ادھر امریکا نے عالمی منڈی میں تیل کی قیمتوں پر پڑنے والے دباؤ کو کم کرنے کے لیے روسی تیل کی فروخت پر عائد کچھ پابندیوں کو عارضی طور پر نرم کرنے کا فیصلہ کیا ہے۔ امریکی حکام کے مطابق اس اقدام کا مقصد جنگی صورتحال کے باعث پیدا ہونے والی سپلائی میں کمی اور قیمتوں میں ممکنہ اضافے کو کنٹرول کرنا ہے۔
امریکی جریدے فنانشل ٹائمز کی رپورٹ کے مطابق روس نے حالیہ دنوں میں چین اور بھارت کو بڑی مقدار میں تیل فروخت کیا ہے۔ رپورٹ میں بتایا گیا ہے کہ ان فروختوں سے روس کو صرف ٹیکس کی مد میں ہی تقریباً 2 ارب ڈالر کی آمدنی حاصل ہوئی ہے۔
ماہرین کے مطابق چین اور بھارت اس وقت روسی تیل کے سب سے بڑے خریدار بن چکے ہیں، جو عالمی پابندیوں کے باوجود رعایتی نرخوں پر روسی تیل خرید رہے ہیں۔ خلیج میں بڑھتی کشیدگی کے بعد ان ممالک نے توانائی کی ضروریات پوری کرنے کے لیے روسی سپلائی پر مزید انحصار بڑھا دیا ہے۔
توانائی کے تجزیہ کاروں کا کہنا ہے کہ اگر آبنائے ہرمز میں کشیدگی برقرار رہی یا جہاز رانی متاثر ہوئی تو عالمی تیل منڈی میں روس کا کردار مزید مضبوط ہو سکتا ہے۔ اس صورتحال سے نہ صرف عالمی قیمتوں میں اتار چڑھاؤ بڑھنے کا امکان ہے بلکہ توانائی کی عالمی سیاست پر بھی اس کے اثرات مرتب ہو سکتے ہیں۔
واضح رہے کہ آبنائے ہرمز دنیا کے اہم ترین بحری تجارتی راستوں میں شمار ہوتی ہے جہاں سے روزانہ لاکھوں بیرل تیل عالمی منڈیوں تک پہنچتا ہے۔ کسی بھی قسم کی رکاوٹ یا بندش عالمی توانائی کی سپلائی اور قیمتوں پر فوری اثر ڈال سکتی ہے۔
