امریکی اڈے پر ایرانی حملے کا خطرہ، قطر نے اپنی فضائی حدود بند کردی

خطے کی کشیدہ صورتحال کے باعث قطر نے اپنی فضائی حدود بند کردی۔

غیر ملکی خبررساں ایجنسی کے مطابق  قطری وزارت خارجہ نے اپنے بیان میں کہا ہے کہ قطر نے خطے کی صورتحال کے باعث اپنی فضائی حدود کو عارضی طور پر بند کر دیا ہے۔

بیان میں کہا گیا کہ یہ اقدام قطر کے رہائشیوں کی حفاظت کو یقینی بنانے کے لیے کیا گیا ہے۔

برطانوی خبر ایجنسی نے مغربی سفارتکار کا حوالہ دیتے ہوئے کہا ہے کہ قطر میں امریکی ائیربیس کے خلاف مستند ایرانی خطرہ موجود ہے،

اس سے قبل امریکا، برطانیہ اور چین نے قطر میں اپنے شہریوں کو محفوظ مقامات پر رہنے کی ہدایت کی تھی۔

خیا ل رہے کہ قطری فضائی حدود کی بندش ایک ایسے وقت میں ہوئی ہے جب ایران نے اپنی جوہری تنصیبات پر امریکی حملوں کے بعد امریکا کے خلاف جوابی کارروائی کی دھمکی دی ہے۔

غیر ملکی خبررساں ایجنسی کے مطابق قطر کی العدید ائیربیس مشرق وسطیٰ میں امریکا کا سب سے بڑا فوجی اڈہ ہے جہاں تقریباً 10 ہزار امریکی فوجی تعینات ہیں۔