کیا ملک ریاض نے معافی سے بازی پلٹ دی؟ شہداء کیلئے 3 ہزار کنال کی پیشکش طاقتور حلقے راضی؟

اسلام آباد پاکستان کے معروف تحقیقاتی صحافی اعزاز سید نے اپنے پروگرام ٹاک شاک میں انکشاف کیا ہے کہ بحریہ ٹاؤن کے سربراہ ملک ریاض نے آرمی چیف کو دو الگ الگ خط لکھے ہیں جن میں انہوں نے باقاعدہ معافی مانگی ہے۔
ذرائع کے مطابق ملک ریاض نے ان خطوط میں نہ صرف معذرت کی بلکہ شہداء کے نام پر 3 ہزار کنال اراضی دینے کی بھی پیشکش کی ہے۔ اس حوالے سے اعزاز سید کا کہنا ہے کہ نگراں وزیراعلیٰ پنجاب محسن نقوی اور ڈی جی ایم آئی کی کوشش ہے کہ ملک ریاض سے معاملات بہتر ہو جائیں۔
اعزاز سید کے مطابق کچھ اشارے ایسے ملے ہیں جن سے پتا چلتا ہے کہ طاقتور حلقوں کی طرف سے بھی معاملات کو آگے بڑھانے کی ہری جھنڈی مل چکی ہے۔ اب دیکھنا یہ ہے کہ ملک ریاض کی یہ پیشکش اور معافی کس حد تک ان کے لیے مشکلات سے نکلنے کا راستہ ہموار کر پائے گی۔
سیاسی اور کاروباری حلقے اس پیشرفت کو بہت اہم قرار دے رہے ہیں کیونکہ اگر معاملات طے پا جاتے ہیں تو نہ صرف ملک ریاض کی مشکلات کم ہوں گی بلکہ طاقتور اداروں کے ساتھ ان کے تعلقات بھی نئے سرے سے استوار ہو سکتے ہیں۔
اب سوال یہ ہے کہ کیا یہ معافی اور پیشکش ملک ریاض کیلئے ڈیل کی طرف ایک نیا دروازہ کھولے گی یا یہ محض وقتی کوشش ہے؟ آنے والے دنوں میں صورتحال مزید واضح ہو گی۔