کراچی: معروف کاروباری شخصیت عارف حبیب نے پاکستان انٹرنیشنل ایئرلائن (پی آئی اے) کو منافع بخش ایئرلائن بنانے کے عزم کا اعادہ کرتے ہوئے کہا ہے کہ ملازمین کو واضح پیغام ہے کہ جو بہترین کارکردگی دکھائے گا، وہی پی آئی اے میں رہے گا۔
میڈیا سے گفتگو کرتے ہوئے عارف حبیب نے کہا کہ معاہدے کے تحت پی آئی اے کا نام تبدیل نہیں کیا جا سکتا، تاہم قومی ایئرلائن کو منافع بخش بنا کر ملازمین کو تحفظ فراہم کیا جائے گا۔ ان کا کہنا تھا کہ بہترین کارکردگی دکھانے والے ملازمین کو ادارے میں برقرار رکھا جائے گا۔
عارف حبیب نے کہا کہ دنیا بھر میں 1 کروڑ 40 لاکھ پاکستانی مقیم ہیں اور اوورسیز پاکستانیوں اور ان کے اہل خانہ کی تعداد 7 کروڑ سے زیادہ ہے، جو پاکستان میں سفر کرتے ہیں۔ انہوں نے کہا کہ کوشش ہوگی کہ پاکستانی زیادہ سے زیادہ صرف پی آئی اے کے ذریعے سفر کریں، اور ایئرلائن کو حج و عمرہ کے لیے ترجیح دی جائے گی۔