اسلام آباد: فیڈرل بورڈ آف ریونیو (ایف بی آر) نے گزشتہ ماہ دسمبر میں کسی بھی سال کے دسمبر کے مقابلے میں ریکارڈ ٹیکس ریونیو جمع کر لیا ہے۔
ایف بی آر حکام نے وزیر خزانہ محمد اورنگزیب کو بریفنگ دیتے ہوئے بتایا کہ ادارے نے دسمبر میں 1427 ارب 10 کروڑ روپے ٹیکس ریونیو جمع کیا، جو 1446 ارب روپے کے ماہانہ ہدف کا تقریباً 99 فیصد بنتا ہے۔
حکام کے مطابق یہ اب تک کسی بھی سال کے دسمبر میں حاصل ہونے والی سب سے زیادہ ٹیکس وصولی ہے۔ بریفنگ میں بتایا گیا کہ ان لینڈ ریونیو سروس (آئی آر ایس) نے بھی شاندار کارکردگی کا مظاہرہ کرتے ہوئے 1310 ارب روپے کے ہدف کے مقابلے میں 1308 ارب روپے ٹیکس وصول کیا، جو 99.8 فیصد ہے۔
ایف بی آر حکام کے مطابق نومبر کے مقابلے میں دسمبر میں ٹیکس وصولی میں 59 فیصد اضافہ ریکارڈ کیا گیا۔ نومبر میں ٹیکس وصولی 898 ارب روپے رہی تھی، جو دسمبر میں بڑھ کر 1427.1 ارب روپے تک پہنچ گئی۔
حکام کا کہنا ہے کہ ٹیکس وصولی میں نمایاں اضافہ معاشی سرگرمیوں میں بہتری اور ٹیکس انتظامیہ کی مؤثر حکمت عملی کا نتیجہ ہے، جبکہ آنے والے مہینوں میں ریونیو اہداف کے حصول کے لیے اقدامات مزید تیز کیے جائیں گے.