کوالالمپور: ملائیشیا کی معروف اداکارہ اور سابق بیوٹی کوئن ایمی نور ٹینی نے حال ہی میں ایک سنسنی خیز انکشاف کیا ہے کہ ایک بااثر شخص نے انہیں اپنی تیسری بیوی بننے کی پیشکش کی، جس میں مہنگا گھر، گاڑی، زمین اور ماہانہ لاکھوں روپے شامل تھے، لیکن انہوں نے اسے فوراً مسترد کر دیا۔
بھارتی میڈیا کے مطابق، 29 سالہ اداکارہ نے یہ انکشاف 25 دسمبر کو ایک پوڈکاسٹ میں گفتگو کے دوران کیا۔ ایمی نور ٹینی نے بتایا کہ یہ پیشکش ایک وی آئی پی (بااثر شخصیت) کی جانب سے کی گئی، جس نے انہیں بنکلا، ایک گاڑی، 10 ایکڑ زمین اور ہر ماہ 50 ہزار ملائیشین رنگٹ (تقریباً 34 لاکھ روپے سے زائد) بطور خرچ دینے کی آفر کی۔
اداکارہ نے کہا کہ وہ اکثر کارپوریٹ ایونٹس کی میزبانی کرتی ہیں، جہاں بااثر شخصیات سے ملاقاتیں ہوتی رہتی ہیں۔ انہوں نے بتایا کہ بہت سے لوگ فون نمبر مانگتے یا ملاقات کی دعوت دیتے ہیں، لیکن اس شخص نے حد پار کرتے ہوئے انہیں اپنی تیسری بیوی بننے کی پیشکش کر دی، جسے ایمی نے فوراً مسترد کر دیا۔
ایمی نور ٹینی نے انکشاف کیا کہ مذکورہ شخص کی عمر تقریباً ان کے والد کے برابر تھی، جس کی وجہ سے یہ پیشکش انہیں اور بھی ناگوار محسوس ہوئی۔
ان کے اس بیان کے بعد سوشل میڈیا پر خواتین کی خودمختاری، بااثر طبقے کے رویوں اور سماجی اقدار کے حوالے سے بحث شروع ہو گئی ہے۔ صارفین نے ادکارہ کے فیصلے کی حمایت کرتے ہوئے کہا کہ یہ اقدام خواتین کی اپنی مرضی اور خودمختاری کے حق کی علامت ہے۔
ماہرین کے مطابق، اس طرح کے انکشافات نہ صرف عوام میں اخلاقی اور سماجی بحث کو جنم دیتے ہیں بلکہ معاشرت میں طاقتور افراد اور عام شہریوں کے تعلقات پر بھی روشنی ڈالتے ہیں۔
ایمی نور ٹینی کی بہادری سے کیے گئے فیصلے کو میڈیا اور عوام میں مثال کے طور پر پیش کیا جا رہا ہے، جس سے خواتین کو اپنے حقوق اور فیصلوں میں آزاد رہنے کی ترغیب مل رہی ہے۔
