سافٹ ویئر کی غلطی سے روسی فیکٹری ملازم کے اکاؤنٹ میں 7 ملین روبل منتقل، رقم واپس کرنے سے انکار پر معاملہ عدالت پہنچ گیا

روس: روس کے شہر خانتی مانسی میں ایک فیکٹری ملازم کے اکاؤنٹ میں سافٹ ویئر کی غلطی کے باعث تمام ملازمین کی تنخواہوں کی رقم منتقل ہوگئی، جس کا مجموعی حجم تقریباً 7 ملین روسی روبل (87 ہزار ڈالر) بنتا ہے۔ تاہم حیران کن طور پر ملازم نے یہ رقم واپس کرنے سے انکار کر دیا، جس کے بعد معاملہ عدالت تک پہنچ گیا۔

غیر ملکی میڈیا کے مطابق ولادی میر ریچاگوو نامی فیکٹری ورکر کو اندازہ تھا کہ اسے صرف چھٹیوں کی تنخواہ کے طور پر تقریباً 46 ہزار روبل (581 ڈالر) ملنے چاہئیں، لیکن بینک ایپ کھولنے پر وہ یہ دیکھ کر حیران رہ گیا کہ اس کے اکاؤنٹ میں لاکھوں نہیں، بلکہ کروڑوں روپے منتقل ہوچکے تھے۔

ولادی میر نے بتایا کہ وہ پہلے یہ سمجھ بیٹھا تھا کہ کمپنی نے بہترین مالی سال کے باعث بڑا بونس دیا ہے، تاہم چند گھنٹوں بعد فیکٹری اکاؤنٹس ڈیپارٹمنٹ نے رابطہ کیا اور بتایا کہ یہ رقم غلطی سے ٹرانسفر ہوئی ہے، لہٰذا اسے واپس کرنا ہوگا۔

ولادی میر نے رقم واپس کیوں نہیں کی؟

ولادی میر کے مطابق اس نے انٹرنیٹ پر قانونی صورتحال کا جائزہ لیا جہاں اسے معلوم ہوا کہ:
• اگر رقم تکنیکی خرابی کے باعث منتقل ہوئی ہو تو قانونی طور پر وصول کنندہ پر واپسی لازم نہیں۔
• تاہم اگر یہ بلنگ کی غلطی ہو تو رقم واپس کرنا ضروری ہے۔

اسی بنیاد پر ولادی میر نے رقم واپس کرنے سے انکار کر دیا۔

معاملہ عدالت تک پہنچا

کمپنی کے مطابق 34 ملازمین کی تنخواہ کمپنی اکاؤنٹ سے ایک تکنیکی خرابی کے باعث ولادی میر کے اکاؤنٹ میں چلی گئی، لہٰذا وہ اس رقم کی واپسی کا پابند ہے۔

دوسری جانب ولادی میر کا کہنا ہے کہ:
• کمپنی کی جانب سے درخواستیں اب دھمکیوں میں بدل چکی تھیں۔
• اس نے رقم سے نئی کار اور نیا گھر خرید لیا اور شہر چھوڑنے کا فیصلہ کیا۔
• مگر گھر منتقل ہونے سے قبل کمپنی نے اس کے خلاف مقدمہ درج کرادیا اور اس کے بینک اکاؤنٹس منجمد کر دیے۔

عدالتی فیصلہ

عدالت نے فراڈ کے الزام کو مسترد کرتے ہوئے ولادی میر کو کمپنی کو 87 ہزار ڈالر واپس کرنے کا حکم جاری کیا۔ تاہم ولادی میر نے اس فیصلے کو سپریم کورٹ میں چیلنج کر دیا ہے، جس کے باعث ادائیگی تاحال نہیں کی جاسکی۔

کمپنی کا کہنا ہے کہ وہ رقم کی واپسی یقینی بنانے کے لیے تمام قانونی راستے اختیار کرے گی.

Related posts

بابا وانگا کی 2026 کے لیے پیشگوئیاں سامنے آ گئیں

دماغ گھما دینے والی پہیلی! ڈیجیٹل گھڑی میں دن میں کتنی بار ترتیب وار ہندسے نظر آتے ہیں؟

دبئی میں دنیا کی سب سے مہنگی کافی پیش — ایک کپ کی قیمت 2 لاکھ 75 ہزار روپے سے زائد