واشنگٹن: وائٹ ہاؤس میں ادویات اور ہیلتھ کیئر سے متعلق منعقدہ تقریب میں ایک شخص اچانک بے ہوش ہوگیا۔ امریکی میڈیا کے مطابق بے ہوش ہونے والا شخص ایک ہیلتھ کیئر کمپنی کا نمائندہ تھا جو صدر ڈونلڈ ٹرمپ اور دیگر سرکاری و صنعتی شخصیات کے ساتھ اسٹیج پر موجود تھا۔
رپورٹس کے مطابق متاثرہ شخص کی طبیعت اچانک خراب ہوئی اور وہ کچھ لمحوں بعد بے ہوش ہو کر گر پڑا۔ اس موقع پر تقریب میں موجود افراد نے فوری طور پر اسے سنبھالا جبکہ نشست پر موجود صدر ٹرمپ بھی فوراً کھڑے ہوگئے۔
وائٹ ہاؤس کی میڈیکل ٹیم نے فوری طور پر متاثرہ نمائندے کو ابتدائی طبی امداد فراہم کی۔ امریکی پریس سیکرٹری کیرولین لیویٹ کا کہنا ہے کہ متعلقہ شخص کی حالت اب خطرے سے باہر ہے اور انہیں مکمل طور پر طبی نگہداشت فراہم کی جارہی ہے۔
واقعے کے بعد اوول آفس میں موجود میڈیا نمائندوں کو کچھ وقت کے لیے کمرے سے باہر نکال دیا گیا، جس کے بعد تقریب کا سلسلہ مختصر وقفے کے بعد دوبارہ بحال ہوا۔