بھارتی ریاست اتر پردیش کے مظفر نگر میں ایک شہری کو ہیلمٹ نہ پہننے اور ڈرائیونگ لائسنس نہ رکھنے پر 20 لاکھ 74 ہزار بھارتی روپے (تقریباً 60 لاکھ پاکستانی روپے) کا چالان تھما دیا گیا، جو بعد میں ٹائپنگ کی غلطی ثابت ہوا۔
رپورٹس کے مطابق یہ واقعہ 4 نومبر کو نئی منڈی پولیس اسٹیشن کے علاقے میں پیش آیا۔ شہری انمول کو دیے گئے چالان میں ہیلمٹ نہ پہننے اور ڈرائیونگ لائسنس نہ رکھنے کی وجہ سے جرمانہ لگایا گیا اور اس کی موٹر سائیکل بھی ضبط کر لی گئی۔
چالان کی تصویر سوشل میڈیا پر وائرل ہوئی تو صارفین حیران رہ گئے کہ معمولی جرم پر اتنی بھاری رقم کیسے عائد کی گئی۔ مظفر نگر پولیس کے اعلیٰ افسران نے وضاحت دی کہ یہ رقم دراصل ڈیجیٹل چالان میں سب انسپکٹر کی ٹائپنگ کی غلطی کی وجہ سے ظاہر ہوئی۔
پولیس کے مطابق سب انسپکٹر کو موٹر وہیکل ایکٹ کی دفعہ 207 کے تحت کارروائی کرنی تھی، جس میں زیادہ سے زیادہ 4 ہزار روپے جرمانہ عائد کیا جا سکتا تھا۔ غلطی سے “207” نمبر کو جرمانے کے خانے میں ڈال دیا گیا، جس کی وجہ سے کمپیوٹر سسٹم نے رقم 20,74,000 روپے ظاہر کر دی۔
ایس پی ٹریفک پولیس نے بتایا کہ اصل جرمانہ صرف 4,000 روپے ہے اور موٹر سائیکل ضبط کی گئی تھی۔ یہ واقعہ سوشل میڈیا پر مزاح اور حیرت کا باعث بنا اور صارفین نے اسے ‘بھارت کا سب سے مہنگا چالان’ قرار دیا۔
