تہران: ایرانی پاسدارانِ انقلاب نے دعویٰ کیا ہے کہ ایران کے اندر موجود امریکی اور اسرائیلی انٹیلیجنس نیٹ ورکس کا مکمل طور پر صفایا کر دیا گیا ہے۔
غیر ملکی میڈیا کے مطابق پاسدارانِ انقلاب کا کہنا ہے کہ یہ نیٹ ورکس غداری اور دھوکہ دہی کے ذریعے ایران کی قومی سلامتی کو نقصان پہنچانے کے لیے قائم کیے گئے تھے۔
بیان میں کہا گیا کہ صیہونی ریاست خطے میں امریکی پراکسی کے طور پر کام کر رہی ہے اور حالیہ 12 روزہ جنگ میں شکست کے بعد ایران کو غیر مستحکم کرنے کی کوششوں میں مصروف ہے۔
پاسدارانِ انقلاب کے مطابق، ملک کے مختلف صوبوں میں ان ملک دشمن نیٹ ورکس کے متعدد ارکان کو گرفتار کیا گیا ہے، جو قومی سلامتی کے لیے سنگین خطرہ بن چکے تھے۔
ایران نے امریکی و اسرائیلی الزامات مسترد کر دیے
دوسری جانب ایرانی وزارتِ خارجہ کے ترجمان اسماعیل بقائی نے میکسیکو میں اسرائیلی سفیر پر قتل کی مبینہ کوشش سے متعلق امریکی و صیہونی الزامات کو بے بنیاد اور مضحکہ خیز قرار دیا ہے۔
انہوں نے کہا کہ صیہونی حکومت کی متعدد سازشوں میں سے ایک یہ ہے کہ وہ ایران کے دیگر ممالک کے ساتھ تعلقات خراب کرنے کی کوشش کر رہی ہے۔
اسماعیل بقائی نے سابق امریکی صدر ڈونلڈ ٹرمپ کے حالیہ بیان کا حوالہ دیتے ہوئے کہا کہ امریکہ نے ایران کے خلاف صیہونی جارحیت میں اپنی شمولیت کا اعتراف کر لیا ہے، جو اس کے پہلے مؤقف کی تردید کرتا ہے۔
انہوں نے مزید کہا کہ ایران نے امریکی و صیہونی جرائم کے شواہد اقوام متحدہ کی سلامتی کونسل میں جمع کروا دیے ہیں اور بین الاقوامی سطح پر ان جارحانہ اقدامات کے خلاف کارروائی کی جائے گی۔