واشنگٹن: امریکی کانگریس کی تازہ رپورٹ میں دعویٰ کیا گیا ہے کہ رواں سال مئی میں پاکستان اور بھارت کے درمیان ہونے والی مختصر مگر شدید جھڑپ میں پاکستان نے فوجی برتری حاصل کی، جس دوران چین نے بھی اپنے جدید دفاعی نظام کا عملی تجربہ کیا۔
رپورٹ کے مطابق چین نے 2024 اور 2025 میں پاکستان کے ساتھ عسکری تعاون میں نمایاں اضافہ کیا، جس میں مشترکہ فوجی مشقیں، انسدادِ دہشت گردی ڈرلز اور پاکستان کی قیادت میں ہونے والی کثیرالملکی امن مشقیں شامل تھیں۔ رپورٹ میں کہا گیا کہ یہ تعاون مستقبل میں دونوں ممالک کے دفاعی تعلقات کو مزید مضبوط بنا سکتا ہے۔
امریکی کانگریس کی رپورٹ کے مطابق چار روزہ جھڑپ کے دوران پاکستان نے چینی ہتھیاروں اور ٹیکنالوجی کے ساتھ نمایاں کارکردگی دکھائی۔ رپورٹ میں بتایا گیا کہ پاکستان کی جانب سے چینی ٹیکنالوجی کی مدد سے بھارت کے فرانسیسی رافیل طیاروں کو نشانہ بنانا، عالمی سطح پر چینی اسلحے کی فروخت کے لیے ایک مؤثر مثال بن گیا ہے۔
رپورٹ کے مطابق یہ پہلا موقع تھا کہ چین کے جدید ہتھیار HQ-9 میزائل ڈیفنس سسٹم، PL-15 ایئر ٹو ایئر میزائلز اور J-10 لڑاکا طیارے کسی حقیقی جنگی صورتحال میں استعمال ہوئے۔ امریکی تجزیے کے مطابق چین کے لیے یہ تجربہ عملی میدان میں اپنی صلاحیتوں کو جانچنے کا اہم موقع ثابت ہوا۔
مزید یہ کہ رپورٹ میں انکشاف کیا گیا ہے کہ چین نے جون 2025 میں پاکستان کو J-35 اسٹیلتھ لڑاکا طیارے، KJ-500 ایئرکرافٹ اور جدید بیلسٹک میزائل ڈیفنس سسٹمز فروخت کرنے کی منظوری دی، جس کے بعد دونوں ممالک کے اسٹریٹجک تعاون میں مزید اضافہ متوقع ہے۔
رپورٹ کے مطابق اسی ماہ پاکستان نے اپنے 2025-2026 کے دفاعی بجٹ میں 20 فیصد اضافہ کیا جس کے بعد مجموعی مالیاتی دباؤ کے باوجود دفاعی اخراجات بڑھ کر 9 ارب ڈالر تک پہنچ گئے۔ تجزیاتی رپورٹ کے مطابق یہ اضافہ ملک کی دفاعی ضروریات اور خطے کی بدلتی صورتحال کا نتیجہ ہے۔
امریکی کانگریس کی اس رپورٹ نے خطے میں اسٹریٹجک توازن اور آئندہ برسوں میں پاک–بھارت تعلقات کے ممکنہ رخ پر نئی بحث چھیڑ دی ہے۔
