دبئی: دبئی ائیر شو 2025 میں بھارتی جنگی طیارہ تیجس کے حادثے کی تحقیقات جاری ہیں۔ حکام کا کہنا ہے کہ حادثے کی وجہ — پائلٹ کی غلطی یا طیارے کی ممکنہ تکنیکی خرابی — کا تعین جامع تحقیقات مکمل ہونے کے بعد کیا جائے گا۔
ایوی ایشن حکام اور عسکری ماہرین پر مشتمل مشترکہ تحقیقاتی ٹیم مختلف پہلوؤں کا جائزہ لے رہی ہے۔ ائیر شو کے آخری روز بھارتی تیجس طیارہ فضا میں گر کر تباہ ہوا تھا، جس کے نتیجے میں بھارتی پائلٹ ہلاک ہوگیا تھا۔ 1989 سے ہر دو سال بعد ہونے والے دبئی ائیر شو کی تاریخ میں یہ پہلا مہلک حادثہ ہے۔
فلائنگ پروٹوکولز کی خلاف ورزی زیرِ تفتیش
ایوی ایشن ذرائع کا کہنا ہے کہ تحقیقات میں یہ دیکھا جا رہا ہے کہ آیا پائلٹ نے فضائی قواعد کی خلاف ورزی کی تھی یا نہیں۔ ائیر شو منتظمین کے مطابق فضائی کرتب کے دوران کم از کم 300 فٹ بلندی برقرار رکھنا لازمی ہوتا ہے، تاہم شبہ ہے کہ بھارتی طیارہ اس حد سے نیچے آگیا تھا۔
غیر منظور شدہ فضائی تکنیک کا استعمال؟
تحقیقاتی ٹیم بھارتی پائلٹ کی جانب سے کسی غیر منظور شدہ فلائنگ تکنیک کے ممکنہ استعمال کے پہلو کا بھی جائزہ لے رہی ہے۔ ساتھ ہی طیارے میں شامل مشینی یا تکنیکی خرابی کے خدشات کو بھی پوری توجہ کے ساتھ دیکھا جارہا ہے۔
“ڈسپلے باکس” کے اندر حادثہ
حادثہ ائیر شو کے لیے مخصوص ڈسپلے باکس کے اندر پیش آیا، جو شائقین سے کم از کم 2 کلومیٹر کے فاصلے پر قائم کیا جاتا ہے۔ دبئی ائیر شو کی فلائنگ کنٹرول کمیٹی بھی تحقیقات میں شریک ہے اور وہ تمام منظور شدہ پروٹوکولز اور دستیاب ویڈیو فوٹیج کا تفصیلی جائزہ لے رہی ہے۔
حکام کا کہنا ہے کہ تحقیقات مکمل ہونے کے بعد ہی حادثے کی اصل وجہ سامنے آ سکے گی۔