کویت سٹی: کویت نے رہائشی علاقوں میں آوارہ جانوروں کی بڑھتی ہوئی تعداد کے پیش نظر کتوں اور بلیوں کی تجارتی درآمد پر پابندی لگا دی ہے۔ حکام کے مطابق یہ اقدام شہری علاقوں میں بے قابو افزائش اور پالتو جانوروں کی بے رخی کے بڑھتے رجحان کو روکنے کے لیے ضروری تھا۔
گلف نیوز کے مطابق کویت کے شعبۂ حیوانی صحت اور وبائی امراض کے سربراہ ڈاکٹر احمد الحماد نے بتایا کہ اب شہری صرف ذاتی استعمال کے لیے سال میں ایک کتا سخت ضوابط کے تحت درآمد کر سکیں گے۔ ان کا کہنا تھا کہ بہت سے درآمد کیے گئے پالتو جانور بالآخر سڑکوں پر چھوڑ دیے جاتے ہیں، جس سے آوارہ جانوروں کی تعداد تیزی سے بڑھ رہی ہے۔
ڈاکٹر الحماد نے بتایا کہ گزشتہ سال رہائشی علاقوں سے ہزاروں آوارہ کتے پکڑے گئے۔ اس صورتحال سے نمٹنے کے لیے حکام نے فوری کارروائی کی غرض سے براہِ راست رپورٹنگ لائن اور واٹس ایپ سروس بھی شروع کی ہے۔
محکمہ آوارہ جانوروں کو پکڑنے کے ساتھ ساتھ نس بندی کے پروگرام بھی چلا رہا ہے تاکہ ان کی آبادی میں کمی لائی جا سکے۔ کچھ جانوروں کا علاج کر کے انہیں محفوظ ماحول میں چھوڑ دیا جاتا ہے، جبکہ جو جانور طبی معائنہ پاس کر لیتے ہیں، انہیں گود لینے کے لیے پیش کیا جاتا ہے، تاکہ شہری علاقوں پر دباؤ کم ہو اور پالتو جانور رکھنے کا ذمہ دارانہ رجحان فروغ پا سکے.