برطانوی اخبار فنانشل ٹائمز نے بھارت سے متعلق ایک تفصیلی رپورٹ میں انکشاف کیا ہے کہ 2025 بھارت کے لیے بحرانوں سے بھرپور سال رہا، جہاں فوجی کشیدگی، معاشی دباؤ اور سفارتی ناکامیوں نے نئی دہلی کو شدید مشکلات سے دوچار کیے رکھا۔
رپورٹ کے مطابق پاک بھارت فوجی کشیدگی، امریکا کے ساتھ تجارتی تنازعات، کرنسی کی کمزوری اور معاشی بے چینی نے بھارت کی مجموعی صورتحال کو متاثر کیا۔ فنانشل ٹائمز کا کہنا ہے کہ بھارت کی نام نہاد اسٹریٹجک خودمختاری بھی ناکام دکھائی دی، جس کے باعث اسے امریکا، چین اور روس کے ساتھ تعلقات میں مجبوری کا سامنا کرنا پڑا۔
برطانوی اخبار کے مطابق 2025 میں امریکا اور بھارت کے درمیان تجارتی معاہدہ متعدد بار ملتوی ہوا، جبکہ امریکی ٹیرف کے باعث بھارتی معیشت پر دباؤ بڑھا۔ رپورٹ میں کہا گیا ہے کہ جی ایس ٹی اصلاحات محدود شعبوں تک رہنے کے سبب معاشی ترقی کی رفتار متاثر رہی اور اسی دوران بھارتی روپیہ ڈالر کے مقابلے میں نمایاں گراوٹ کا شکار رہا۔
فنانشل ٹائمز کی رپورٹ میں یہ بھی کہا گیا ہے کہ پاک بھارت تصادم کا ایک دیرپا نتیجہ واشنگٹن کی پالیسی میں واضح تبدیلی کی صورت میں سامنے آیا۔ ماہرین کے مطابق امریکی صدر کی جانب سے جنگ بندی کا کریڈٹ لینا بھارت کی سفارتی ناکامی قرار دیا جا رہا ہے۔
ماہرین کا کہنا ہے کہ سابق امریکی صدر ڈونلڈ ٹرمپ کے پاکستانی عسکری قیادت سے بڑھتے روابط بھارت کے لیے ایک بڑا سفارتی دھچکا ہیں۔ برطانوی اخبار نے بھی ان روابط کو بھارت کی خارجہ پالیسی کی ناکامی سے تعبیر کیا ہے۔
ماہرین کے مطابق امریکا میں بھارت کی معاشی اور سفارتی گنجائش محدود ہوتی جا رہی ہے، جو اس کی کمزور عالمی پوزیشن کی عکاسی کرتی ہے۔ مزید برآں، روپے کی مسلسل گراوٹ اور تیل کی قیمتوں میں اضافے سے بھارت کو مزید معاشی بحران کا سامنا ہو سکتا ہے۔
رپورٹ میں کہا گیا ہے کہ امریکا بھارت تجارتی معاہدوں میں ناکامی بھارت کی عالمی معاشی ساکھ میں بڑھتے خلا کی علامت ہے۔ ماہرین کا کہنا ہے کہ بھارت نے 2025 میں مسائل حل کرنے کے بجائے زیادہ تر انہیں برداشت کیا۔
ماہرین کے مطابق 2026 بھارت کے لیے اندرونی کمزوریوں، علاقائی کشیدگی اور عالمی دباؤ کے باعث مزید چیلنجز لے کر آ سکتا ہے، اور موجودہ حالات نئی دہلی کے لیے تشویش ناک اشارے دے رہے ہیں۔
