سوئٹزرلینڈ: لگژری اِسکی ریزورٹ کے بار میں دھماکا، ہلاکتیں 40 ہو گئیں، 100 افراد زخمی

سوئٹزرلینڈ کے معروف لگژری اِسکی ریزورٹ کرانس مونٹانا میں واقع ایک بار میں ہونے والے زوردار دھماکے کے نتیجے میں ہلاک افراد کی تعداد 40 ہو گئی جبکہ تقریباً 100 افراد زخمی ہو گئے ہیں، جن میں سے بیشتر کی حالت تشویشناک بتائی جا رہی ہے۔

غیر ملکی میڈیا رپورٹس کے مطابق سوئس پولیس کا کہنا ہے کہ دھماکا ریزورٹ کے ایک بار میں ہوا جس کے فوراً بعد شدید آگ بھڑک اٹھی۔ واقعے کے وقت بار میں نیو ایئر نائٹ منانے کے لیے لوگوں کی بڑی تعداد موجود تھی۔

سوئس پولیس حکام نے ابتدائی طور پر غیر ملکی خبر ایجنسی کو بتایا تھا کہ دھماکے میں متعدد افراد ہلاک اور زخمی ہوئے ہیں، تاہم اس وقت ہلاکتوں، زخمیوں کی حتمی تعداد اور دھماکے کی وجوہات سے متعلق تفصیلات فراہم نہیں کی گئیں۔

بعد ازاں اطالوی وزارت خارجہ نے سوئس پولیس کے حوالے سے تصدیق کی کہ بار میں ہونے والے دھماکے کے نتیجے میں تقریباً 40 افراد ہلاک ہو چکے ہیں۔ سوئس پولیس کمشنر کے مطابق آگ لگنے کے باعث 100 کے قریب افراد زخمی ہوئے، جن میں سے بیشتر شدید زخمی ہیں۔

سوئس حکام کا کہنا ہے کہ متاثرین میں کچھ غیر ملکی شہری بھی شامل ہیں، تاہم واقعے کو دہشت گردی یا حملہ قرار نہیں دیا جا رہا۔ پولیس کے مطابق ابتدائی تحقیقات کے مطابق یہ ایک حادثہ ہو سکتا ہے، تاہم تمام پہلوؤں سے تحقیقات جاری ہیں۔

پولیس حکام نے بتایا کہ دھماکا بدھ اور جمعرات کی درمیانی شب ایک بج کر 30 منٹ پر ہوا۔ واقعے کے بعد ریسکیو ٹیموں نے فوری طور پر کارروائی کرتے ہوئے زخمیوں کو قریبی اسپتالوں میں منتقل کیا، جبکہ آگ پر قابو پا لیا گیا۔

سوئس حکام نے واقعے پر گہرے دکھ اور افسوس کا اظہار کرتے ہوئے کہا ہے کہ مکمل تحقیقات کے بعد دھماکے کی اصل وجوہات سامنے لائی جائیں گی۔