گلوبل اکنامک گیلپ سروے: معیشت اور امن کے حوالے سے پاکستان بھارت سے آگے نکل گیا

گلوبل اکنامک گیلپ سروے کے مطابق پاکستان نے معیشت اور عالمی امن کے حوالے سے بھارت کو پیچھے چھوڑ دیا ہے۔ سروے میں بتایا گیا ہے کہ 2026 کے آغاز پر پاکستان کی کارکردگی بھارت اور عالمی اوسط دونوں سے بہتر رہی۔

60 ممالک میں کیے گئے گلوبل اکنامک گیلپ سروے کے نتائج کے مطابق پاکستان میں 51 فیصد افراد آنے والے سال کے بارے میں پُرامید ہیں، جبکہ مجموعی طور پر 31 فیصد افراد نے مثبت معاشی رائے کا اظہار کیا۔

سروے کے مطابق 53 فیصد پاکستانیوں کا ماننا ہے کہ 2026 خوشحالی کا سال ثابت ہوگا۔ یہ شرح بھارت میں موجود 39 فیصد کے مقابلے میں نمایاں طور پر زیادہ ہے، جبکہ یہ عالمی اوسط 24 فیصد سے بھی کہیں بلند ہے۔

گیلپ سروے میں یہ بھی بتایا گیا ہے کہ امن کے حوالے سے بھی پاکستان نے بہتر کارکردگی دکھائی ہے۔ رپورٹ کے مطابق 52 فیصد پاکستانیوں کو امید ہے کہ دنیا میں امن بڑھے گا، جبکہ بھارت میں امن کے حوالے سے پُرامیدی کی شرح صرف 26 فیصد ریکارڈ کی گئی۔

سروے میں کہا گیا ہے کہ پاکستان میں امن کے حوالے سے پُرامیدی کی یہ سطح 1994 کے بعد بلند ترین سطحوں میں سے ایک ہے، جو عوامی اعتماد اور مستقبل سے وابستہ مثبت توقعات کی عکاسی کرتی ہے۔

ماہرین کے مطابق گلوبل سروے کے یہ نتائج اس امر کی نشاندہی کرتے ہیں کہ پاکستانی عوام نہ صرف معاشی بہتری بلکہ عالمی امن کے مستقبل کے حوالے سے بھی نسبتاً زیادہ پُرامید ہیں، جو خطے میں پاکستان کے بڑھتے اعتماد کو ظاہر کرتا ہے۔