کیوبا اور وینزویلا نے امریکی فوجی کارروائی میں ہلاک ہونے والے اپنے 55 فوجی اہلکاروں کے نام جاری کر دیے ہیں۔
غیر ملکی میڈیا رپورٹس کے مطابق گزشتہ ہفتے ہونے والے امریکی حملے میں کیوبا کے 32 جبکہ وینزویلا کے 23 فوجی اہلکار مارے گئے۔
کیوبا کی سرکاری ویب سائٹ کیوبا ڈیبیٹ پر شائع ہونے والی تفصیلات کے مطابق ہلاک ہونے والے 32 اہلکاروں میں سے 21 وزارتِ داخلہ سے تعلق رکھتے تھے، جن میں تین اعلیٰ افسران شامل ہیں۔ ان افسران میں دو کرنل اور ایک لیفٹیننٹ کرنل شامل تھے، جبکہ باقی اہلکار انقلابی مسلح افواج کا حصہ تھے جن کی اکثریت عام فوجیوں پر مشتمل تھی۔
دوسری جانب وینزویلا کی فوج نے بھی 23 اہلکاروں کی ہلاکت کے نوٹس جاری کیے ہیں۔ فہرست کے مطابق ہلاک ہونے والوں میں 5 ایڈمرلز، مختلف رینک کے 16 سارجنٹس اور 2 فوجی شامل ہیں۔
ایک امریکی اخبار کے مطابق امریکی حکام کا اندازہ ہے کہ وینزویلا میں ہونے والی اس فوجی کارروائی کے دوران مجموعی طور پر تقریباً 75 افراد ہلاک ہوئے۔ رپورٹ میں کہا گیا ہے کہ ہلاکتیں دارالحکومت کراکس میں صدر نکولس مادورو کے کمپاؤنڈ پر شدید فائرنگ اور جھڑپوں کے دوران ہوئیں۔
واضح رہے کہ امریکا نے ہفتے کے روز وینزویلا پر حملہ کیا تھا، جس کے بعد امریکی ڈیلٹا فورس نے صدر نکولس مادورو اور ان کی اہلیہ کو صدارتی محل سے حراست میں لے لیا۔
امریکی صدر ڈونلڈ ٹرمپ نے دعویٰ کیا ہے کہ مادورو اور ان کی اہلیہ کو ان کے بیڈ روم سے گرفتار کر کے نیویارک منتقل کیا گیا، جہاں ان کے خلاف منشیات اسمگلنگ اور دہشت گردی سے متعلق الزامات کے تحت مقدمات چلائے جائیں گے۔
