امریکی صدر ڈونلڈ ٹرمپ نے ایران کو ایک بار پھر سخت پیغام دیتے ہوئے کہا ہے کہ امریکا نے ایک انتہائی طاقتور بحری بیڑا واضح مقصد کے تحت ایران کی جانب روانہ کر دیا ہے، جو ہر قسم کی کارروائی کی مکمل صلاحیت رکھتا ہے۔
صدر ٹرمپ نے سوشل میڈیا پر جاری اپنے بیان میں انکشاف کیا کہ اس بحری بیڑے کی قیادت جدید اور مہلک صلاحیتوں سے لیس طیارہ بردار بحری جہاز ابراہم لنکن کر رہا ہے، جو حجم اور طاقت کے لحاظ سے وینزویلا کی جانب بھیجے گئے بحری بیڑے سے بھی کہیں بڑا ہے۔
ان کا کہنا تھا کہ یہ بیڑا صرف علامتی موجودگی نہیں بلکہ ضرورت پڑنے پر فوری اور فیصلہ کن کارروائی کرنے کی مکمل اہلیت رکھتا ہے۔ صدر ٹرمپ نے خبردار کیا کہ اگر حالات نے تقاضا کیا تو امریکا طاقت کے استعمال سے بھی گریز نہیں کرے گا۔
امریکی صدر نے اس موقع پر ایران کو مذاکرات کی پیشکش دہراتے ہوئے کہا کہ واشنگٹن اب بھی چاہتا ہے کہ تہران بات چیت کی میز پر آئے اور ایک ایسا معاہدہ طے پائے جو منصفانہ، مساوی اور تمام فریقوں کے مفاد میں ہو۔ ٹرمپ نے واضح کیا کہ کسی بھی معاہدے کی بنیادی شرط یہ ہوگی کہ ایران جوہری ہتھیار حاصل نہیں کرے گا۔
صدر ٹرمپ نے مزید کہا کہ وقت تیزی سے نکلتا جا رہا ہے اور صورتحال غیر معمولی طور پر سنجیدہ ہو چکی ہے۔ انہوں نے یاد دلایا کہ ایران کو ماضی میں بھی معاہدے کا موقع دیا گیا تھا، تاہم انکار کے نتیجے میں آپریشن مڈنائٹ ہیمر جیسی کارروائی عمل میں آئی، جس میں ایران کو شدید نقصان اٹھانا پڑا۔
ٹرمپ نے سخت لہجے میں خبردار کیا کہ اگر ایران نے اب بھی معاہدہ نہ کیا تو آئندہ کارروائی پہلے سے کہیں زیادہ شدید اور تباہ کن ہو سکتی ہے۔ ان کا کہنا تھا کہ امریکا کسی بھی ایسے اقدام کو دوبارہ دہرانے سے روکنا چاہتا ہے، مگر اس کے لیے ایران کو سنجیدہ فیصلے کرنا ہوں گے۔
بین الاقوامی مبصرین کے مطابق امریکی صدر کے اس بیان کے بعد خطے میں کشیدگی میں مزید اضافہ متوقع ہے، جبکہ عالمی طاقتیں صورتحال پر گہری نظر رکھے ہوئے ہیں۔
