وزیراعلیٰ پنجاب مریم نواز شریف نے بہاولنگر میں قائم ٹیکنیکل ٹریننگ انسٹی ٹیوٹ فلڈ ریلیف کیمپ کا دورہ کیا۔ وزیراعلیٰ نے فلڈ ریلیف کیمپ میں پیدا ہونے والے بچوں کے والدین سے ملاقات کی، مبارکباد دی اور نیک دعائیں کیں۔ اس موقع پر ایک بچے کا نام نواز شریف اور بچی کا نام مریم رکھا گیا۔
وزیراعلیٰ مریم نواز شریف نے فلڈ ریلیف کیمپ میں قائم صنعت زار مرکز کا بھی معائنہ کیا جہاں انہوں نے سلائی کڑھائی کرنے والی خواتین سے خوشگوار موڈ میں گفتگو کی۔ وزیراعلیٰ نے خود سلائی مشین پر کپڑے کی سلائی کی اور سوئی سے کڑھائی بھی کی، جس پر انہوں نے خوشی کا اظہار کیا۔
دورے کے دوران وزیراعلیٰ پنجاب نے خواتین اور مرد متاثرین سے ملاقات کی اور سہولتوں کی فراہمی کے حوالے سے دریافت کیا۔ وہ خواتین کے ساتھ بیٹھ گئیں اور بچوں سے شفقت کا اظہار کیا۔ عارضی کلاسز میں موجود معصوم بچے وزیراعلیٰ سے مل کر خوشی سے نہال ہو گئے اور انہوں نے اپنے ہاتھوں سے بنے پینسل سکچ وزیراعلیٰ کو تحفے میں دیے۔ مریم نواز شریف نے بھی متاثرہ خواتین اور بچوں کو تحائف پیش کیے۔
وزیراعلیٰ نے عارضی ہسپتال میں داخل مریضوں کی عیادت کی اور ان کے لیے بھی تحائف لے کر گئیں۔ انہوں نے متاثرہ خواتین اور بچوں کے ساتھ دسترخوان پر بیٹھ کر کھانا بھی کھایا۔
اس موقع پر ڈی جی پی ڈی ایم اے اور ڈپٹی کمشنر بہاولنگر نے وزیراعلیٰ کو بریفنگ دی۔ بریفنگ کے مطابق:
• سیلاب سے بہاولنگر کی 26 یونین کونسلیں متاثر ہوئیں اور ایک لاکھ سے زائد آبادی متاثر ہوئی۔
• متاثرہ آبادی کا بروقت محفوظ انخلا یقینی بنایا گیا۔
• متاثرین کے لیے 20 فلڈ ریلیف کیمپ قائم کیے گئے ہیں۔
• ہیلتھ کاؤنٹر، کلینک آن ویل اور موبائل ہیلتھ یونٹس کے ذریعے 40 ہزار سے زائد متاثرین کا علاج کیا گیا۔
• متاثرہ علاقوں سے مویشی محفوظ مقامات پر منتقل کیے گئے۔
• متاثرین میں 10 کلو کے 15 ہزار 795 بیگ، 1198 سائلج اور 399 ٹن بھوسہ و توڑی تقسیم کی گئی۔
• سیلاب کے پیش نظر منہ کھر کی بیماری سے بچاؤ کے لیے 37 لاکھ 70 ہزار چھوٹے بڑے جانوروں کی ویکسی نیشن کی گئی جبکہ 5 ملحقہ اضلاع میں بفر زون قائم کیا گیا۔
وزیراعلیٰ مریم نواز شریف نے اس موقع پر کہا کہ حکومت متاثرین کو تنہا نہیں چھوڑے گی اور ہر ممکن ریلیف فراہم کیا جائے گا۔
