اسلام آباد: روسی تیل کمپنیوں پر امریکی پابندیوں کے بعد پاکستان میں یکم نومبر سے پیٹرولیم مصنوعات کی قیمتوں میں اضافے کا امکان ظاہر کیا جا رہا ہے۔
ذرائع کے مطابق عالمی منڈی میں تیل کی قیمتوں میں اتار چڑھاؤ اور روسی کمپنیوں پر تازہ امریکی پابندیوں کے اثرات کے باعث پیٹرول کی قیمت میں 1 روپے 48 پیسے اور مٹی کے تیل میں 2 روپے 34 پیسے فی لیٹر تک اضافہ متوقع ہے۔
اگر موجودہ رجحان برقرار رہا تو یکم نومبر سے پیٹرولیم مصنوعات کی نئی ممکنہ قیمتیں درج ذیل ہوسکتی ہیں:
• پیٹرول: 264 روپے 50 پیسے فی لیٹر
• ہائی اسپیڈ ڈیزل: 276 روپے 80 پیسے فی لیٹر
• مٹی کا تیل: 184 روپے 05 پیسے فی لیٹر
• لائٹ ڈیزل: 163 روپے 25 پیسے فی لیٹر
ذرائع کا کہنا ہے کہ پیٹرولیم مصنوعات کی حتمی قیمتوں کا اعلان 31 اکتوبر کی شام کیا جائے گا، جب کہ اوگرا (OGRA) کی جانب سے 15 روزہ درآمدی لاگت اور زرمبادلہ کے اثرات کا تفصیلی جائزہ لیا جا رہا ہے۔
اقتصادی ماہرین کے مطابق، امریکی پابندیوں کے باعث روس سے تیل کی درآمدات متاثر ہونے کا خدشہ ہے، جس سے عالمی منڈی میں سپلائی کے دباؤ کے ساتھ علاقائی سطح پر قیمتوں میں اضافہ دیکھنے میں آ سکتا ہے۔