لاہور: وزیراعلیٰ پنجاب مریم نواز شریف سے نیشنل ڈیفنس یونیورسٹی (NDU) کے 27ویں نیشنل سکیورٹی ورکشاپ کے شرکاء نے ملاقات کی۔ اس موقع پر وزیراعلیٰ نے وفد کا پرتپاک خیرمقدم کیا اور شرکاء کو حکومت پنجاب کے عوامی فلاح و بہبود کے مختلف اقدامات سے آگاہ کیا۔
مریم نواز شریف نے شرکاء کے سوالات کے جواب دیتے ہوئے کہا کہ حکومت پنجاب نے صحت، تعلیم، ماحولیات، زراعت، انفراسٹرکچر اور سماجی خدمات کے شعبوں میں نمایاں اقدامات کیے ہیں اور آئندہ بھی کئی نئے منصوبے شروع کیے جائیں گے۔ انہوں نے بتایا کہ “آپریشن بنیان مرصوص” کی کامیابی کے بعد پاکستان دنیا بھر میں ہر مقام پر سربلند ہے۔
وزیراعلیٰ نے کہا کہ وسائل کی غیر منصفانہ تقسیم اور احتساب کے فقدان کی وجہ سے پبلک سیکٹر میں کارکردگی متاثر ہوتی ہے۔ انہوں نے سیلاب زدگان اور مویشیوں کی بروقت بچاؤ کی کارروائیوں، متعدی امراض کے پھیلاؤ کی روک تھام اور سموگ کنٹرول کے اقدامات پر روشنی ڈالی۔
مریم نواز نے بتایا کہ پنجاب میں ایئر کوالٹی مانیٹرنگ، کالادھواں کی ڈیجیٹل نگرانی، میرٹ اور شفافیت کے اصولوں پر بھرتیاں کی جا رہی ہیں اور اعلیٰ سطح پر کرپشن مکمل طور پر کنٹرول میں ہے۔ انہوں نے خواتین کے لیے سرکاری عہدوں پر ترقی، صحت کے جدید ہسپتالوں کی تعمیر، ایئر ایمبولینس سروس اور بچوں کے ہارٹ سرجری کارڈ پراجیکٹ جیسے اقدامات بھی اجاگر کیے۔
انہوں نے کہا کہ لاہور ڈویلپمنٹ پلان، پنجاب ڈویلپمنٹ پروگرام، ویسٹ مینجمنٹ، تعلیم، سرمایہ کاری اور انڈسٹریل زونز کے منصوبے پنجاب کی ترقی کو تیز کریں گے۔ مریم نواز شریف نے کہا کہ پنجاب میں 2400 میگاواٹ بجلی کے منصوبے اور اربوں روپے کے ترقیاتی منصوبے کرپشن فری ماحول میں مکمل ہو رہے ہیں اور پانچ سال میں پنجاب کو مکمل طور پر کرپشن فری بنانے کا عزم ہے۔
انہوں نے مزید کہا کہ سیاسی الزامات اور تنقید کا جواب پرفارمنس کے ذریعے دیا جائے گا اور سکولوں و کالجوں کو ڈرگ فری بنانے کے اقدامات جاری ہیں۔
این ڈی یو نیشنل سکیورٹی ورکشاپ کے وفد کے سربراہ نے وزیراعلیٰ پنجاب کی شاندار میزبانی اور معلوماتی بریفنگ پر شکریہ ادا کیا۔
