پاکستان نے بھارت کو منہ توڑ جواب دیا، دنیا بھی معترف ہے: رانا ثناء اللہ

فیصل آباد: وزیراعظم کے مشیر برائے سیاسی و عوامی امور رانا ثناء اللہ نے کہا ہے کہ دنیا نے ہی نہیں بلکہ بھارت نے بھی تسلیم کیا کہ پاکستان نے حالیہ جھڑپ میں اسے منہ توڑ جواب دیا۔ وہ فیصل آباد میں ضمنی انتخاب میں ووٹ کاسٹ کرنے کے بعد میڈیا سے گفتگو کر رہے تھے۔

رانا ثناء اللہ کا کہنا تھا کہ ضمنی انتخابات میں عمومی طور پر ٹرن آؤٹ 25 سے 30 فیصد تک رہتا ہے اور انہیں امید ہے کہ عوام مسلم لیگ ن کا ساتھ دیں گے۔

عمران خان کے حوالے سے گفتگو

عمران خان سے متعلق سوال پر انہوں نے کہا کہ بانی پی ٹی آئی نے کبھی سیاست ہی نہیں کی، بدقسمتی ہے کہ انہیں ملکی سیاست پر مسلط کیا گیا۔
ان کا کہنا تھا کہ جب وہ برسرِ اقتدار تھے تو کہتے تھے کسی سے بات نہیں کروں گا، جبکہ ان کا بیشتر وقت مخالفین پر مقدمات بنانے میں گزرتا رہا۔

رانا ثناء اللہ نے کہا کہ ن لیگ آج بھی سیاسی جماعتوں کے ساتھ بیٹھ کر مسائل کے حل کے لیے بات چیت کے حق میں ہے۔ وزیراعظم نے ’’میثاقِ پاکستان‘‘ پر مذاکرات کی پیشکش کی لیکن دوسری جانب سے ڈیڈلاک پیدا کیا گیا۔

انتخابات اور انتظامی امور

وزیراعظم کے مشیر نے کہا کہ حلقے میں نہ کسی کو گرفتار کیا گیا اور نہ ہی روکنے کی کوئی شکایت سامنے آئی۔ انہوں نے بتایا کہ الیکشن کے باعث وزیر اعلیٰ مریم نواز کو ترقیاتی منصوبوں کے اعلان سے روکا گیا تھا، تاہم منصوبوں کی پلاننگ مکمل ہو چکی ہے۔

انہوں نے کہا کہ ن لیگ اور پی ٹی آئی نے جو کام کیے وہ عوام کے سامنے ہیں اور ووٹر خود فیصلہ کریں گے۔

بھارت کے ساتھ جھڑپ

بھارت کے ساتھ مئی میں ہونے والی جھڑپ سے متعلق سوال کے جواب میں رانا ثناء اللہ کا کہنا تھا کہ دنیا نے ہی نہیں بھارت نے بھی اعتراف کیا کہ پاکستان نے اسے منہ توڑ جواب دیا۔

انہوں نے کہا کہ ملکی دفاع مضبوط ہے اور پاکستان ہر جارحیت کا جواب دینے کی صلاحیت رکھتا ہے.