لاہور: وزیراعلیٰ پنجاب مریم نواز شریف نے صوبے بھر میں گورننس، صفائی اور انتظامی امور کی نگرانی مزید سخت کرتے ہوئے واضح کر دیا ہے کہ غیر معیاری کارکردگی یا کسی بھی قسم کی کوتاہی پر کسی کو رعایت نہیں ملے گی۔ انہوں نے ضلعی انتظامیہ، صفائی کے ٹھیکیداروں، ہاؤسنگ سوسائٹیز اور سرکاری اداروں کے لیے سخت ہدایات جاری کر دیں۔
ڈپٹی کمشنرز کے لیے سخت KPI جانچ پڑتال
وزیراعلیٰ کی زیر صدارت اجلاس میں ’’کی پرفارمنس انڈیکیٹرز‘‘ کی سخت جانچ ہوئی۔
مریم نواز کی ہدایت پر ہر ضلع میں گورننس کے معیار کی نگرانی کے لیے خفیہ ٹیمیں بھیجی جائیں گی۔
صفائی کے ناقص انتظامات پر برہمی
وزیراعلیٰ نے بعض شہروں میں صفائی کی خراب صورتِ حال پر شدید ناراضی کا اظہار کیا اور واضح کیا کہ:
• ستھرا پنجاب کے ناقص کارکردگی دکھانے والے کنٹریکٹرز کی ادائیگیاں فوری معطل ہوں گی۔
• صفائی کی صورتحال بہتر نہ ہونے پر کنٹریکٹ دوبارہ کرنے پر غور کیا جائے گا۔
• پنجاب بھر میں کوڑے دان روزانہ دھوئے جائیں اور ویسٹ انکلوژرز کی مکمل چاردیواری تعمیر کی جائے۔
• شہروں میں پارکنگ ایریاز، بس اسٹینڈز، اڈوں، اور تمام عوامی مقامات پر مثالی صفائی یقینی بنائی جائے۔
تجاوزات، ریڑھیاں اور سرکاری نرخ ناموں پر کریک ڈاؤن
• پنجاب میں تجاوزات کے مستقل خاتمے کے لیے 24/7 سی سی ٹی وی مانیٹرنگ ہوگی۔
• غیر قانونی تعمیرات اور قبضے لمحوں میں ڈیجیٹل ریکارڈ پر آ جائیں گے۔
• ٹریفک میں رکاوٹ بننے والی ریڑھیاں فوری ہٹانے کا حکم۔
• مارکیٹ انتظامیہ سے صفائی اور نظم و ضبط کی تحریری یقین دہانی لی جائے گی۔
• نرخ ناموں کی خلاف ورزی پر سخت کارروائی اور فوری گرفتاریاں یقینی بنانے کی ہدایت۔
ضلعی سربراہان کے لیے سخت وارننگ
مریم نواز نے کہا:
• مسلسل ناقص کارکردگی پر ڈپٹی کمشنرز کو تبدیل کر دیا جائے گا۔
• دو وارننگز کے بعد تیسری پر فوری ہٹایا جائے گا۔
• “فنڈز دینے کے باوجود بہترین نتائج نہ آنا افسوسناک ہے، کوئی کوتاہی برداشت نہیں۔”
شہری سہولیات اور سڑکوں کی بہتری کے احکامات
• ہر شہر کے داخلی و خارجی راستوں کی مکمل صفائی اور گرین بیلٹس کی بحالی۔
• بازاروں کے خطرناک بجلی کے تار فوری درست کرنے کا حکم۔
• تمام سڑکوں پر لین مارکنگ مکمل کی جائے۔
• اسسٹنٹ کمشنرز خود صفائی اور نظم و نسق کی نگرانی کریں۔
• تمام پبلک ٹوائلٹس کی مستقل صفائی یقینی بنائی جائے۔
• تمام ہائی ویز کے پٹرول پمپس پر صاف ستھرے واش روم لازمی ہوں۔
• نئے پٹرول پمپس پر الیکٹرک چارجنگ اسٹیشن کا قیام لازمی قرار۔
ہاؤسنگ سوسائٹیز، پارکس اور شجرکاری
• پرائیویٹ ہاؤسنگ سوسائٹیز میں صفائی، مین ہول ڈھکن اور اسٹریٹ لائٹس لازمی۔
• احکامات پر عمل نہ کرنے والی سوسائٹیز پر جرمانے کی تجویز۔
• مساجد کے وضو خانے کا پانی شجرکاری کے لیے استعمال کرنے کی ہدایت۔
• پارکس، گرین بیلٹس میں شجرکاری اور گھاس کی باقاعدہ دیکھ بھال۔
سوشل ایونٹس اور مقامی قوانین
• شادیوں میں 10 بجے ختم کرنے اور ون ڈِش پالیسی کی سختی سے پابندی کا حکم۔
• مریم نواز نے کہا کہ برازیل میں درخت کی شاخ کاٹنا بھی جرم ہے، ہم بھی ماحولیات پر سختی لائیں گے۔
مریم نواز کے اہم ریمارکس
وزیراعلیٰ نے کہا:
• “پنجاب گڈ گورننس میں دیگر صوبوں سے بہتر ہے، مگر میں مطمئن نہیں۔”
• “ہر شہر کو ایسے صاف کریں جیسے اپنا گھر صاف رکھتے ہیں۔”
• “40 سے 50 ارب کی مشینری اور ڈیڑھ لاکھ عملے کے باوجود کوڑے کے ڈھیر نظر آنا ناقابل قبول ہے۔”
• “پوری انتظامیہ کو اختیارات، فنانس اور اعتماد دیا ہے، اب 100 فیصد نتائج چاہئیں۔”
وزیراعلیٰ نے واضح کیا کہ صوبے کے ہر شعبے میں نیکسٹ لیول گورننس مطلوب ہے، اور اسی سمت اقدامات جاری رہیں گے.
