وزیراعظم محمد شہباز شریف دو روزہ سرکاری دورے پر بحرین کے دارالحکومت منامہ پہنچ گئے ہیں۔ منامہ ائیرپورٹ پر ان کا پرتپاک استقبال بحرین کے ولی عہد و بحرینی افواج کے نائب سپریم کمانڈر و وزیراعظم عزت مآب شہزادہ سلمان بن حمد الخلیفہ، نائب وزیراعظم عزت مآب خالد بن عبداللہ الخلیفہ، وزیر خارجہ عزت مآب ڈاکٹر عبد اللطیف بن رشید الزایانی اور بحرینی قیادت کے دیگر سینیئر ارکان نے کیا۔
وزیراعظم شہباز شریف 26 سے 27 نومبر تک بحرین میں قیام کریں گے، اور ان کے ہمراہ نائب وزیراعظم/وزیر خارجہ سینیٹر محمد اسحاق ڈار، وزیر داخلہ سید محسن رضا نقوی, وفاقی وزیر اطلاعات عطا اللہ تارڑ, وزیر مملکت بلال اظہر کیانی اور دیگر سینئر افسران وفد میں شامل ہیں۔
دورے کے دوران وزیراعظم بحرین کی قیادت سے اعلیٰ سطحی ملاقاتیں کریں گے، جن میں بادشاہ شاہ حمد بن عیسیٰ الخلیفہ، ولی عہد و وزیراعظم شہزادہ سلمان بن حمد الخلیفہ اور نائب وزیراعظم شیخ خالد بن عبداللہ الخلیفہ سے ملاقات شامل ہے۔
یہ سرکاری دورہ پاکستان اور بحرین کے دیرینہ دوستانہ تعلقات کی مضبوطی اور دونوں ممالک کے درمیان نتائج پر مبنی اور تزویراتی شراکت داری کو فروغ دینے کے مقصد سے کیا گیا ہے۔ دورے کے دوران باہمی تعاون، عوامی رابطوں اور دوطرفہ تعلقات کی نئی راہیں متعین کرنے پر زور دیا جائے گا.