کراچی: ایئربس A320 طیاروں میں سافٹ ویئر کے نئے مسئلے کے انکشاف کے بعد خدشہ ظاہر کیا جا رہا ہے کہ پاکستان میں بھی فلائٹ آپریشن متاثر ہو سکتا ہے۔
تفصیلات کے مطابق دنیا بھر میں ایئربس A320 طیاروں کو سنگین تکنیکی چیلنجز کا سامنا ہے۔ کمپنی کے نئے 104 سافٹ ویئر ریلیز میں خرابی کے باعث سولر ریڈی ایشن (شمسی تابکاری) سے متاثر ہونے کی شکایات سامنے آئی ہیں، جس کے بعد متعدد ایئر لائنز نے اپنے طیارے گراؤنڈ کر دیے ہیں۔
ایئربس نے عالمی ایئر لائنز کو فوری ہدایت جاری کرتے ہوئے پرانے سافٹ ویئر ورژن کو دوبارہ لوڈ کرنے کا حکم دیا ہے۔ کمپنی کے مطابق دنیا بھر میں موجود 6 ہزار سے زائد A320 طیارے اس مسئلے سے متاثر ہو سکتے ہیں۔
یورپی یونین ایوی ایشن سیفٹی ایجنسی (EASA) نے بھی ایئر وردی نیس ایڈوائزری جاری کرتے ہوئے متعلقہ طیاروں کو فوری معائنہ کرنے اور ضروری اپ ڈیٹ مکمل ہونے تک انہیں گراؤنڈ رکھنے کی ہدایت کی ہے۔
پاکستان میں مختلف ایئر لائنز A320 طیارے استعمال کرتی ہیں، جس کے باعث یہاں بھی فلائٹ آپریشن میں رکاوٹ کا خدشہ بڑھ گیا ہے۔
تاہم پی آئی اے نے وضاحت کی ہے کہ اس کے کسی بھی طیارے میں مذکورہ متاثرہ سافٹ ویئر انسٹال نہیں ہے۔ ترجمان پی آئی اے نے واضح کیا کہ قومی ایئر لائن کا بیڑا مکمل طور پر محفوظ ہے اور آپریشن معمول کے مطابق جاری رہے گا.