لاہور: پنجاب میں عوام کو صاف، محفوظ اور شفاف خریداری کی سہولت فراہم کرنے کے لیے وزیراعلیٰ مریم نواز شریف کی ہدایات پر صوبے بھر کی سبزی اور پھل منڈیوں کو جدید خطوط پر استوار کر دیا گیا ہے۔ پنجاب کی 188 سبزی منڈیاں اب ماڈرن فروٹ اینڈ ویجی ٹیبل مارکیٹس میں تبدیل ہو چکی ہیں، جہاں گندگی، بدبو، اندھیرے اور بدنظمی کا خاتمہ کر دیا گیا ہے۔
ماڈرن سبزی منڈیوں میں براہِ راست نیلامی، فعال آکشن شیڈز اور شفاف ریٹ سسٹم نافذ کر دیا گیا ہے جس سے منڈی مافیا کا کردار ختم ہو گیا ہے۔ خریداروں اور آڑھتیوں کے لیے ہیلپ ڈیسک، ریٹ بورڈ، صاف پانی کے فلٹریشن پلانٹس، مکمل فعال ٹائلٹس، صفائی کا نیا نظام اور جدید ویسٹ کولیکشن سسٹم متعارف کرایا گیا ہے۔
خریداری کو دن رات محفوظ بنانے کے لیے پنجاب بھر کی سبزی منڈیوں میں 2 لاکھ 66 ہزار سے زائد اسٹریٹ لائٹس فعال کر دی گئی ہیں جبکہ تمام منڈیوں میں ڈرینج سسٹم بحال اور ہر مین ہول پر ڈھکن لگا دیے گئے ہیں۔
ویسٹ ٹو ویلیو اور جدید ٹیکنالوجی
ماڈرن سبزی منڈیوں میں ویسٹ ٹو ویلیو پروگرام کا آغاز کر دیا گیا ہے، جس کے تحت گرین ویسٹ کو بائیو گیس اور پولٹری فیڈ بنانے کے لیے استعمال کیا جائے گا۔ پنجاب میں پہلی بار سبزی اور پھلوں کی طلب و رسد کا ریکارڈ رکھنے کے لیے ٹریکنگ آن ویل سسٹم نافذ کیا گیا ہے، جبکہ صوبے میں آنے والے ہر سبزی اور پھل کے ٹرک کی ٹریکنگ سیف سٹی اتھارٹی سے منسلک کر دی گئی ہے۔
نئی منڈیاں اور مری کے لیے خصوصی اقدام
پاکپتن، قصور، ساہیوال، میاں چنوں، شیخوپورہ اور منڈی بہاؤالدین میں نئی ماڈرن سبزی منڈیاں قائم کی جائیں گی۔ مری کے عوام کو سستے داموں پھل اور سبزیاں فراہم کرنے کے لیے سپلائی چین سسٹم قائم کر دیا گیا ہے، جہاں ہول سیل نرخوں پر اشیائے خورونوش دستیاب ہوں گی۔
آف سیزن سبزیاں اور سخت احتساب
وزیراعلیٰ مریم نواز شریف نے آف سیزن سبزیوں کے حصول کے لیے جدید طریقہ کاشت اختیار کرنے کی ہدایت جاری کی ہے۔ انہوں نے عوام کو دھوکہ دینے والے پرائس کنٹرول مجسٹریٹس کے خلاف فوری کارروائی کا حکم دیتے ہوئے کہا کہ ایسے افسران کو نوکری سے فارغ کر کے جیل بھیجا جائے گا۔
مارکیٹ کمیٹیوں میں پبلک سروس کمیشن کے ذریعے میرٹ پر سیکرٹریوں کی بھرتی کی اجازت بھی دے دی گئی ہے۔
وزیراعلیٰ کا مؤقف
وزیراعلیٰ مریم نواز شریف نے کہا کہ
“پنجاب سے مافیا کلچر کا خاتمہ کر دیا گیا ہے، اب یہاں کوئی مافیا پنپ نہیں سکتا۔ عوام کو ہر صورت سستی روٹی اور سستا آٹا فراہم کریں گے۔ میں خود پھل اور سبزی منڈیوں کے سرپرائز وزٹ کروں گی۔ پنجاب میں ہونے والے ترقیاتی کام دوسرے صوبوں کے لیے مثال بن چکے ہیں۔”
وزیراعلیٰ نے وزیر زراعت عاشق کرمانی، معاون خصوصی سلمیٰ بٹ، ڈی جی فوڈ امجد حفیظ اور ان کی پوری ٹیم کو شاندار کارکردگی پر شاباش بھی دی۔
