اسلام آباد: پاکستان تحریکِ انصاف (پی ٹی آئی) کے بانی عمران خان کی جانب سے سماجی رابطوں کے پلیٹ فارم ’’ایکس‘‘ پر جاری تازہ بیان نے عملاً اپوزیشن اتحاد کے سربراہ محمود خان اچکزئی کی مذاکرات کی اپیل کو مسترد کر دیا ہے۔ پی ٹی آئی کی قیادت نے واضح کر دیا ہے کہ احتجاجی تحریک سے متعلق عمران خان کی ہدایات ہی حتمی ہوں گی اور پارٹی اسی لائن پر عمل کرے گی۔
پی ٹی آئی کے سیکرٹری اطلاعات شیخ وقاص اکرم نے اس حوالے سے کہا ہے کہ چونکہ احتجاجی تحریک کی پالیسی براہِ راست عمران خان کی جانب سے آئی ہے، اس لیے وہی نافذالعمل ہوگی۔ ان کا کہنا تھا کہ محمود خان اچکزئی مذاکرات سمیت اپنی سیاسی سرگرمیاں جاری رکھ سکتے ہیں، تاہم پی ٹی آئی قیادت عمران خان کی تازہ ہدایات کی پابند ہے۔
شیخ وقاص اکرم کے مطابق عمران خان نے وزیراعلیٰ خیبرپختونخوا کو ہدایت دی ہے کہ وہ قانون کی حکمرانی اور آئین کی بالادستی کے لیے احتجاجی تحریک کی تیاری کریں۔ انہوں نے واضح کیا کہ پارٹی کی حتمی پالیسی عمران خان کی ہدایات کے مطابق ہی طے کی جائے گی۔
دوسری جانب وزیراعظم شہباز شریف کے قریبی ذرائع کا کہنا ہے کہ 9 مئی کے واقعات اور عمران خان و پی ٹی آئی کی جانب سے مبینہ فوج مخالف سوشل میڈیا مہم پر اظہارِ ندامت یا معذرت کے بغیر پی ٹی آئی کے ساتھ بامعنی مذاکرات ممکن نہیں۔ ذرائع کے مطابق حکومت کا موقف ہے کہ ان واقعات کو نظرانداز کرتے ہوئے مذاکرات کا آغاز نہیں کیا جا سکتا۔
ذرائع نے کہا کہ 9 مئی کو فوجی تنصیبات پر حملے کیے گئے، شہداء کا تمسخر اڑایا گیا اور فوج اور اس کی اعلیٰ قیادت کے خلاف کردار کشی کی مہم چلائی گئی، ایسے حالات میں بغیر معذرت کے مذاکرات ممکن نہیں۔
واضح رہے کہ اپوزیشن اتحاد کی جانب سے گزشتہ روز منعقدہ قومی کانفرنس میں محمود خان اچکزئی نے کہا تھا کہ آئین کو چیتھڑوں میں تبدیل کر دیا گیا ہے اور موجودہ نازک صورتحال میں سابق وزیراعظم نواز شریف اور جمعیت علمائے اسلام کے سربراہ مولانا فضل الرحمٰن کو آگے آ کر ملک کو بحران سے نکالنے کے لیے مذاکرات کا آغاز کرنا چاہیے۔
اسی روز عمران خان نے ’’ایکس‘‘ پر جاری بیان میں نہ صرف فیلڈ مارشل پر تنقید کی بلکہ وزیراعلیٰ خیبرپختونخوا کو احتجاجی تحریک کی تیاری کی ہدایت بھی دی، جس کے بعد پی ٹی آئی کی پالیسی ایک بار پھر واضح ہو گئی ہے کہ پارٹی احتجاجی راستے پر ہی گامزن رہے گی۔