اسلام آباد: چیئرمین پاکستان تحریکِ انصاف (پی ٹی آئی) بیرسٹر گوہر نے ہم خیال سیاسی جماعتوں کو ایک پلیٹ فارم پر لانے کے لیے کمیٹی بنانے کی تجویز پیش کر دی ہے اور موجودہ حالات میں جامع مذاکرات کی ضرورت پر زور دیا ہے۔
ایک بیان میں بیرسٹر گوہر نے کہا کہ یہ ملک اور فوج ہم سب کی ہے، ہم پہلے بھی ساتھ رہے ہیں اور آئندہ بھی ساتھ رہیں گے۔ ان کا کہنا تھا کہ “ہاتھ ملاؤ تاکہ راستہ بنے، بات کرو تاکہ بات سے بات بنے”، کیونکہ ملکی حالات اس بات کے متقاضی ہیں کہ سنجیدہ اور جامع مذاکرات کیے جائیں۔
دوسری جانب وزیراعلیٰ خیبرپختونخوا سہیل آفریدی نے وفاقی حکومت پر تنقید کرتے ہوئے کہا کہ ایک صوبے کو تمام وسائل دیے جا رہے ہیں جبکہ خیبرپختونخوا کو اس کا حق نہیں مل رہا۔ انہوں نے کہا کہ آئی ایم ایف کی کرپشن رپورٹ پر کوئی بات نہیں کی جا رہی اور وفاق کے ذمے واجب الادا رقوم فوری طور پر صوبے کو ادا کی جانی چاہئیں۔
پی ٹی آئی رہنما اسد قیصر نے کہا کہ ملک میں جمہوریت کا جنازہ نکال دیا گیا ہے اور اپوزیشن کے لوگ پنجاب میں رہائش تک نہیں رکھ سکتے، جو سیاسی ماحول کی سنگینی کو ظاہر کرتا ہے۔
سابق وزیراعظم شاہد خاقان عباسی نے اس موقع پر کہا کہ آئین پر عمل کیے بغیر ملک آگے نہیں بڑھ سکتا۔ ان کا کہنا تھا کہ معاشی استحکام کے بغیر ترقی ممکن نہیں اور ہمیں آئین کی بحالی کے لیے جدوجہد کرنا ہوگی۔
سیاسی رہنماؤں کے بیانات ایسے وقت سامنے آئے ہیں جب ملک کو سیاسی اور معاشی چیلنجز کا سامنا ہے اور مختلف حلقوں کی جانب سے مکالمے اور اتفاقِ رائے پر زور دیا جا رہا ہے۔