لاہور: پنجاب اسمبلی میں وزیراعلیٰ خیبرپختونخوا سہیل آفریدی کی آمد کے موقع پر پیش آنے والے ہلڑ بازی کے واقعے سے متعلق اسپیکر پنجاب اسمبلی ملک محمد احمد خان کی جانب سے قائم کی گئی تحقیقاتی کمیٹی کی رپورٹ منظرِ عام پر آ گئی ہے۔
رپورٹ میں ہلڑ بازی میں ملوث افراد کے خلاف قانونی کارروائی کی سفارش کی گئی ہے جبکہ معاملے کی مکمل تفتیش کے لیے قانون نافذ کرنے والے اداروں کی مدد لینے کی تجویز بھی دی گئی ہے۔
تحقیقاتی رپورٹ کے مطابق وزیراعلیٰ خیبرپختونخوا کی آمد پر اپوزیشن کی جانب سے ساتھ آنے والے مہمانوں کی فہرست فراہم کی گئی، تاہم یہ فہرست صرف ناموں پر مشتمل تھی جس کے باعث افراد کی شناخت میں شدید مشکلات پیش آئیں۔ رپورٹ میں کہا گیا ہے کہ اپوزیشن کی جانب سے دی گئی فہرست ناکافی تھی کیونکہ اس میں شناختی کارڈ نمبرز، تصاویر اور گاڑیوں کے نمبرز شامل نہیں تھے۔
رپورٹ کے مطابق مطیع اللّٰہ برقی نامی شخص نے جھوٹ بول کر پنجاب اسمبلی میں داخل ہونے کی کوشش کی اور خود کو خیبرپختونخوا اسمبلی کے حلقہ پی کے 89 سے ایم پی اے اشفاق ظاہر کیا۔ رپورٹ میں بتایا گیا ہے کہ صوبائی وزیر خیبرپختونخوا مینا خان نے اس بات کی تصدیق کی کہ مطیع اللّٰہ برقی ایم پی اے اشفاق نہیں ہیں۔
تحقیقاتی رپورٹ کے مطابق جب مطیع اللّٰہ برقی کو اسمبلی سے باہر جانے کا کہا گیا تو انہوں نے اسمبلی سکیورٹی اہلکاروں کے ساتھ ہاتھا پائی کی اور گالم گلوچ کی۔
رپورٹ میں مزید کہا گیا ہے کہ اپوزیشن کی جانب سے فہرست جمع کرواتے وقت یقین دہانی کرائی گئی تھی کہ شناخت کے عمل میں مدد کے لیے پاکستان تحریک انصاف کے دو ارکان مین گیٹ پر موجود رہیں گے، تاہم ایسا نہیں کیا گیا۔
رپورٹ کے مطابق اسمبلی سکیورٹی نے قافلے سے تحمل کے ساتھ شناخت مکمل کرنے کی درخواست کی، مگر اس کے باوجود گالم گلوچ اور دھکم پیل کی گئی۔ رپورٹ میں یہ بھی انکشاف کیا گیا ہے کہ اپوزیشن کی جانب سے فراہم کردہ فہرست میں سزا یافتہ شخص حیدر مجید کا نام بھی شامل تھا۔
تحقیقاتی رپورٹ میں بتایا گیا ہے کہ اسمبلی سیکرٹریٹ نے موقع پر موجود اسمبلی سکیورٹی اہلکاروں کے بیانات بھی قلم بند کیے ہیں اور تمام شواہد کی روشنی میں مزید کارروائی کی سفارش کی گئی ہے۔
