راولپنڈی: عوامی مسلم لیگ کے سربراہ شیخ رشید احمد نے چیف جسٹس آف پاکستان سے 9 مئی کے مقدمات میں دائر اپیلوں کو جلد سماعت کے لیے مقرر کرنے کی درخواست کر دی ہے۔
راولپنڈی کی انسدادِ دہشت گردی عدالت میں جی ایچ کیو حملہ کیس سمیت 9 مئی سے متعلق 12 مقدمات کی سماعت ہوئی۔ سماعت کے بعد عدالت کے باہر میڈیا سے گفتگو کرتے ہوئے شیخ رشید نے کہا کہ وہ 9 مئی کے روز پاکستان میں موجود نہیں تھے، تاہم اس کے باوجود ان کے خلاف مقدمات قائم ہیں۔
شیخ رشید کا کہنا تھا کہ چیف جسٹس سے دردمندانہ اپیل ہے کہ ملک میں غریب عوام شدید مسائل کا شکار ہیں، مہنگائی اور بے روزگاری کے باعث لوگوں کے گھروں کے چولہے نہیں جل رہے۔
انہوں نے مزید کہا کہ 9 مئی کے کیسز میں اپیلوں کو سنے جانے میں بہت تاخیر ہو چکی ہے، اس لیے چیف جسٹس سے گزارش ہے کہ عوام کی اپیلیں جلد سنی جائیں تاکہ ان مقدمات کے فیصلے ممکن ہو سکیں۔
شیخ رشید نے کہا کہ بروقت انصاف نہ صرف متاثرہ افراد کے مسائل کم کرے گا بلکہ عدالتی نظام پر عوام کے اعتماد کو بھی مضبوط بنائے گا.