کراچی: وفاقی وزیر داخلہ محسن نقوی نے ایف آئی اے کراچی زون کا دورہ کیا جہاں انہوں نے خصوصی اجلاس کی صدارت کرتے ہوئے ایف آئی اے کراچی زون اور ساوتھ زون کی مجموعی کارکردگی کا تفصیلی جائزہ لیا۔
اجلاس کے دوران وزیر داخلہ محسن نقوی نے منی لانڈرنگ میں ملوث مافیا کے خلاف بھرپور اور بلا امتیاز کریک ڈاؤن کا حکم دیا۔ انہوں نے ہدایت کی کہ بڑے منی لانڈرز کے خلاف سخت کارروائی کی جائے اور منی لانڈرنگ میں ملوث عناصر کی مکمل منی ٹریل کو بے نقاب کیا جائے۔ وزیر داخلہ کا کہنا تھا کہ حوالہ اور ہنڈی کا غیر قانونی کاروبار کسی صورت برداشت نہیں کیا جائے گا اور قانون کی عملداری ہر حال میں یقینی بنائی جائے۔
محسن نقوی نے انسانی سمگلنگ میں ملوث ایجنٹس مافیا کے خلاف بھی موثر اور بے خوف کارروائی کی ہدایت کرتے ہوئے کہا کہ معصوم شہریوں کو بیرون ملک ملازمت کا جھانسہ دے کر بھیجنے والے عناصر کسی رعایت کے مستحق نہیں۔ انہوں نے زور دیا کہ ایجنٹس مافیا کے خلاف کسی دباؤ کے بغیر کارروائیاں کی جائیں۔
وزیر داخلہ نے جعلی ادویات کے کاروبار کو انسانیت کے خلاف جرم قرار دیتے ہوئے کہا کہ اس مکروہ دھندے میں ملوث افراد انسانی جانوں سے کھیل رہے ہیں، ایسے عناصر کو قانون کی گرفت میں لایا جائے اور کسی قسم کی نرمی نہ برتی جائے۔
اجلاس میں وزیر داخلہ کو بریفنگ دیتے ہوئے بتایا گیا کہ گزشتہ چار ماہ کے دوران انسانی سمگلنگ میں ملوث 20 ایجنٹس کو گرفتار کیا گیا جبکہ 140 ملین روپے مالیت کی نان کسٹم مصنوعات اور منشیات ضبط کی گئیں۔ اس کے علاوہ مسافروں کی سہولت کے لیے کراچی ایئرپورٹ پر سہولت سینٹر بھی قائم کر دیا گیا ہے۔
محسن نقوی نے یقین دہانی کرائی کہ ایف آئی اے کراچی زون میں انسانی وسائل کی کمی کو ترجیحی بنیادوں پر پورا کیا جائے گا اور افسران کو تمام ضروری وسائل فراہم کیے جائیں گے، تاہم انہوں نے واضح کیا کہ بہتر کارکردگی کے ذریعے ادارے کی نیک نامی میں اضافہ افسران کی ذمہ داری ہے۔
وزیر داخلہ نے اجلاس کے دوران تمام انچارج افسران سے ان کے متعلقہ سرکلز کی کارکردگی رپورٹس طلب کیں اور مزید محنت اور پیشہ ورانہ لگن سے کام کرنے کی ہدایت کی۔
اجلاس میں ایڈیشنل ڈائریکٹر جنرل ایف آئی اے ساوتھ مجاہد اکبر خان، ڈائریکٹر ایف آئی اے کراچی زون، ڈپٹی ڈائریکٹر اینٹی منی لانڈرنگ، اینٹی کرپشن، اینٹی اسمگلنگ، امیگریشن، کرائمز، کمرشل بینکنگ سمیت تمام ڈپٹی ڈائریکٹرز اور متعلقہ حکام نے شرکت کی۔