ایپل اپنے آئی فونز میں سیٹلائیٹ پر مبنی جدید فیچرز متعارف کرانے کی منصوبہ بندی کر رہا ہے۔ اس سے صارفین ایسے علاقوں میں بھی نیوی گیشن اور میسجنگ سہولت استعمال کر سکیں گے جہاں سیلولر یا انٹرنیٹ سروس دستیاب نہیں۔
ابھی آئی فون کے مختلف ماڈلز میں ایمرجنسی سیٹلائیٹ میسجنگ فیچر موجود ہے، جس کے ذریعے صارفین مشکل حالات میں امدادی اداروں سے رابطہ کر سکتے ہیں۔ تاہم، کمپنی اب اس فیچر کو مزید جدید بنانے پر کام کر رہی ہے۔
بلومبرگ کی رپورٹ کے مطابق ایپل ایک نئی API پر کام کر رہا ہے جس سے ایپ ڈویلپرز اپنی ایپس میں سیٹلائیٹ کنکشن سپورٹ شامل کر سکیں گے۔ اسی طرح ایپل میپس کا ایسا ورژن بھی تیار کیا جا رہا ہے جو سیلولر یا وائی فائی کے بغیر بھی صارفین کو نیویگیشن میں مدد فراہم کرے گا۔
مزید یہ کہ کمپنی سیٹلائیٹ میسجز میں فوٹوز بھی بھیجنے کی سہولت پر کام کر رہی ہے، اور صارفین اس وقت بھی سیٹلائیٹ سے منسلک ہو سکیں گے جب فون کا رخ آسمان کی جانب نہ ہو۔
رپورٹ کے مطابق نئے بیسک فیچرز صارفین کے لیے مفت ہوں گے، جبکہ ایڈوانسڈ سپورٹ کے لیے فیس ادا کرنا ہوگی۔ یہ تمام فیچرز ایسے حالات میں مددگار ثابت ہوں گے جہاں روایتی موبائل نیٹ ورکس دستیاب نہیں ہوتے۔