نئی دہلی: بھارتی فرسٹ کلاس کرکٹ میں ایک نیا اور حیران کن ریکارڈ قائم ہوگیا۔ میگھالیہ کی جانب سے کھیلنے والے کرکٹر آکاش کمار چوہدری نے رنجی ٹرافی کے پلیٹ گروپ میچ میں 8 گیندوں پر مسلسل 8 چھکے لگا کر تاریخ رقم کردی۔
میڈیا رپورٹس کے مطابق آکاش کمار نے اروناچل پردیش کے خلاف بیٹنگ کرتے ہوئے صرف 11 گیندوں اور 9 منٹ میں نصف سنچری مکمل کی، جو فرسٹ کلاس کرکٹ کی تیز ترین ففٹی قرار دی جارہی ہے۔ انہوں نے ایک اوور میں 6 چھکے اور اگلے اوور میں مزید 2 چھکے لگائے۔
آکاش نمبر 8 پر اس وقت بیٹنگ کے لیے آئے جب ٹیم 6 وکٹوں پر 576 رنز بنا چکی تھی۔ انہوں نے ابتدا میں ایک ڈاٹ اور 2 سنگلز لیے، جس کے بعد بائیں ہاتھ کے اسپنر لیمار دابی کے ایک ہی اوور میں 6 چھکوں کی بارش کردی۔ اس طرح وہ فرسٹ کلاس کرکٹ کی تاریخ میں ایک اوور میں 6 چھکے لگانے والے دنیا کے تیسرے بیٹر بن گئے۔ اس سے پہلے یہ کارنامہ صرف گار فیلڈ سوبرز (1968) اور روی شاستری (1985) انجام دے چکے ہیں۔
بعد ازاں، آکاش نے اگلے اوور میں دو مزید چھکے مارتے ہوئے صرف 14 گیندوں پر 50 رنز ناٹ آؤٹ مکمل کیے۔ ان کی مکمل اننگز میں ایک بھی چوکا شامل نہیں تھا، جبکہ تمام رنز 8 چھکوں کی مدد سے بنائے گئے۔
اس سے قبل فرسٹ کلاس کرکٹ کی تیز ترین نصف سنچری کا ریکارڈ 2012 میں سابق انگلش کرکٹر وین وائٹ کے پاس تھا، جنہوں نے 12 گیندوں پر ففٹی بنائی تھی۔ آکاش نے یہ ریکارڈ 1 گیند پہلے توڑ ڈالا۔
آکاش کی دھواں دھار بیٹنگ کے بعد میگھالیہ نے اننگز 629 رنز پر ڈکلیئر کر دی۔
یہ فرسٹ کلاس کرکٹ کی تاریخ میں پہلی بار ہوا ہے کہ کسی بیٹر نے مسلسل 8 چھکے لگائے ہوں۔
